Farg‘ona viloyati hokimligi So‘x tumaniga oziq-ovqat mahsulotlari, qurilish materiallari va boshqa ko‘plab aholi kundalik hayoti uchun zarur bo‘lgan buyumlar ortilgan xayriya karvoni yubordi. Bu haqda viloyat hokimligi matbuot xizmati xabar bermoqda.
Qayd etilishicha, bugungi kunda tumandagi mavjud muammolarni bartaraf etish, aholi turmush darajasini yanada yaxshilash borasida ko‘plab takliflar asosida dastur ishlab chiqildi. 2020—2022-yillarda So‘x tumanini kompleks rivojlantirishga 500 milliard so‘m mablag‘ yo‘naltirish ko‘zda tutilgan.
Xususan, “Farg‘ona hududiy elektr tarmoqlari korxonasi” aksiyadorlik jamiyati 16 ta transformator, 80 dona beton ustunlar, 70 kilometrdan ortiq elektr uzatish kabellari kabi 2 milliard 251 million so‘mlikdan ortiq jihozlarni tuman aholisi uchun taqdim qildi.
“Hududgaz Farg‘ona” mas’uliyati cheklangan jamiyati esa 11 ta maxsus mashinada suyultirilgan gaz ballonlarini, O‘zbekiston tumanidagi “Beruniy” mahalla fuqarolar yig‘ini ahli esa 5 tonna un mahsulotini so‘xliklarga beminnat yordam sifatida yubordi.
Viloyat sog‘liqni saqlash boshqarmasi tomonidan zamonaviy tibbiyot jihozlari ajratildi.
Shuningdek, viloyatdagi bozorlar tomonidan So‘x tumanida arzonlashtirilgan mahsulotlar savdosi yo‘lga qo‘yilmoqda.
Avvalroq 230 nafar so‘xlik Tashkent City’dagi qurilish ishlarida qatnashish uchun olib kelinayotgani xabar berilgan edi.
Ma’lumot uchun, 31-may kuni O‘zbekistonning So‘x tumani Chashma qishlog‘i va Qirg‘izistonning Qadamjoy tumani Chechme qishlog‘i aholisi o‘rtasida Qirg‘iziston hududida joylashgan, suvidan O‘zbekiston ham foydalanadigan Chashma bulog‘i ustida bahs chiqib, katta mojaroga aylanib ketgan. So‘x tumani hokimligi ma’lumotlariga ko‘ra, hodisa oqibatida 187 nafar o‘zbekistonlik tan jarohati olgan, O‘zbekiston hududidagi uchta xonadonda yong‘in chiqqandi.
Mazkur voqealar ortidan O‘zbekiston hukumati a’zolari hududdagi muammolarni o‘rganish uchun 2-iyun kuni u yerga tashrif buyurdi. Shuningdek, Abdulla Aripov Qirg‘iziston rasmiylari bilan uchrashib, hodisa yuzasidan muzokara olib bordi. So‘x tumaniga yangi hokim va ichki ishlar bo‘limiga yangi rahbar tayinlandi.
Izoh (0)