Germaniyaning Elektron Innovativ firmasi Italiyaning Scuderia-E hamda elektr energiyasini saqlash tizimini ishlab chiqaruvchi Turkiyaning Imecar kompaniyasi bilan birgalikda megavattli One superkarini yaratmoqda, deb xabar beradi Motor.
Elektron Innovativ kompaniyasi mashinaning texnik tavsifini batafsil oshkor etishni ma’qul ko‘rmagan, shu sababli One haqida minimum ma’lumotlar mavjud. Superkar monokoki ugleplastik, aramid va biotolalar aralashmasidan ishlangan bo‘lib, strukturasi akkumulyator moduli bilan integratsiyalashgan. Model bir megavatt yoki 1360 ot kuchiga ega bir necha elektromotor yordamida harakatga keladi. Elektron One taqdim etilishi bilan “Formula E” chempionati uchun italyan-turk jamoasi ham shakllantiriladi, ular kompaniyaning keyingi modellarini sinovdan o‘tkazadi.
Rejaga ko‘ra, uchta model taqdim etiladi. Birinchisi, One’ning ochiq versiyasi, shuningdek, trek uchun yengillashtirilgan variant. Besh yildan so‘ng, Elektron Innovativ poyga texnologiyalariga ega giperkarni taqdim etish niyatida. Bundan tashqari, brend lineykasidan elektromototsikl ham o‘rin olishi mumkin. Kompaniya hozircha yiliga 140 nusxadagi superkarlarni ishlab chiqarishni rejalashtirmoqda, keyinroq ushbu ko‘rsatkich 500 nusxaga chiqariladi. One modellarining narxi 300-350 ming yevro atrofida bo‘ladi, bu esa uning ommabopligini oshirishga xizmat qiladi.
Mavzuga doir:
Izoh (0)