AQShda sodir bo‘lgan ommaviy norozilik namoyishlari vaqtida bezorilar noyob Porsche 911 versiyasini yaroqsiz holga keltirdi, deb xabar beradi Motor.
997 kuzovidagi noyob Porsche 911 GT3 RS sportkari afro-amerikalik Jord Floydning o‘limi sabab yuzaga kelgan norozilik namoyish “jabrlanuvchi”siga aylandi. Bezorilar tomonidan oynalari sindirilgan kupe ko‘chaning markaziga tashlab ketilgan — mashina egasi kalitni olib, avtomobildan qochib ketishga ulgurgan ko‘rinadi.
Tartibsizlik va bosqinlardan so‘ng, Porsche 911’ning birorta ham butun tashqi elementi qolmagan: kuzoviga graffitilar chizilgan, oynalari, orqa spoyler va old spiltteri singan, tomi qiyshaygan, orqani ko‘rishga mo‘ljallangan o‘ng yon oyna sug‘urib olingan, qanotlari ezilgan, salonga esa o‘t o‘chiruvchi moslama ko‘piklari sepib tashlangan.
Shunga qaramay, Porsche 911 GT3 RS’ning omadi kelgan: avtomobil yoqib yuborilmagan, shu sababli uning texnik quvvati saqlab qolingan. Modelga 415 ot kuchiga ega atmosfera dvigateli o‘rnatilgan bo‘lib, u olti pog‘onali mexanik uzatmalar qutisi yordamida boshqariladi.
Avvalroq AQShdagi norozilik namoyishchilari Manxettendagi do‘konlarni o‘margani, ayrimlar avtosalonlarga bostirib kirib, mashinalarni yoqib yuborgani va 50 ta sportkarni minib qochgani haqida xabar berilgandi.
Eslatib o‘tamiz, Minneapolis shahri politsiyasi vakili 25-may kuni 46 yoshli afro-amerikalik Jorj Floydni qo‘lga olish chog‘ida uni tutib, yerga yotqizgan va tizzasi bilan bo‘ynini bosgan. Politsiyachi uni shu tariqa uzoq vaqt ushlab turishi Jorj Floydning o‘limiga sabab bo‘lgan. Holat aks etgan video ijtimoiy tarmoqlarda tarqalgach, AQShning turli hududlarida norozilik namoyishlari boshlangan. AQShning 25 ta shahrida ommaviy noroziliklar sabab komendantlik soati e’lon qilindi. Donald Tramp Oq uy qarshisida sodir bo‘lgan norozilik namoyishi vaqtida yerosti bunkeriga berkingani ma’lum bo‘ldi.
Izoh (0)