Toshkentdagi uchta oliy ta’lim muassasasida yangi o‘quv yilidan boshlab tajriba tariqasida masofaviy ta’lim shakli joriy etiladi. Bu haqda Davlat test markazining matbuot xizmati xabar berdi.
Ma’lum qilinishicha, 2020/2021-o‘quv yilidan boshlab Muhammad al-Xorazmiy nomidagi Toshkent axborot texnologiyalari universiteti, Toshkent davlat yuridik universiteti va Toshkent davlat pedagogika universitetida tajriba tariqasida bosqichma-bosqich masofaviy o‘qitish shakli joriy etilishi rejalashtirilgan.
Axborot texnologiyalari va kommunikatsiyalarini rivojlantirish, Adliya hamda Oliy va o‘rta maxsus ta’lim vazirliklari tomonidan 1-avgustga qadar masofaviy o‘qitish shaklini amalga oshirish tartibi belgilanadi, dasturiy-apparat kompleksi yaratiladi va tegishli OTMlarning o‘quv jarayoniga masofaviy o‘qitish platformasi joriy etiladi hamda zarur bo‘lgan uskunalar bilan jihozlanadi.
Shuningdek, 2020-yilda matematika, kimyo-biologiya, geologiya kabi yo‘nalishlarda fundamental va amaliy tadqiqotlar faollashtirilib, olimlarga barcha shart-sharoitlarni yaratish choralari ko‘riladi.
Bundan tashqari, 1-sentabrga qadar ilm-fanning ishlab chiqarish bilan faol integratsiyalashuvini ta’minlash maqsadida fundamental va innovatsion tadqiqotlar uchun maqsadli grant mablag‘larini ajratish mexanizmi tubdan qayta ko‘rib chiqiladi.
Eslatib o‘tamiz, Vazirlar Mahkamasi huzuridagi Ta’lim sifatini nazorat qilish davlat inspeksiyasi matbuot kotibi Feruza Madrahimova 17-aprel kuni o‘tkazilgan brifingda 2020-yil davlat dasturida yangi o‘quv yilidan boshlab mamlakatdagi ayrim oliy ta’lim muassasalarida masofaviy ta’lim berish tizimini tashkil etish ko‘zda tutilganini aytgandi. Masofaviy ta’lim berish amaliyoti joriy etilgach, respublikada amalda mavjud bo‘lgan ta’lim shakli bo‘lganligi uchun masofaviy ta’lim orqali o‘qib olingan hujjatlar belgilangan tartibda tan olinadi.
Izoh (0)