Тошкентдаги учта олий таълим муассасасида янги ўқув йилидан бошлаб тажриба тариқасида масофавий таълим шакли жорий этилади. Бу ҳақда Давлат тест марказининг матбуот хизмати хабар берди.
Маълум қилинишича, 2020/2021-ўқув йилидан бошлаб Муҳаммад ал-Хоразмий номидаги Тошкент ахборот технологиялари университети, Тошкент давлат юридик университети ва Тошкент давлат педагогика университетида тажриба тариқасида босқичма-босқич масофавий ўқитиш шакли жорий этилиши режалаштирилган.
Ахборот технологиялари ва коммуникацияларини ривожлантириш, Адлия ҳамда Олий ва ўрта махсус таълим вазирликлари томонидан 1 августга қадар масофавий ўқитиш шаклини амалга ошириш тартиби белгиланади, дастурий-аппарат комплекси яратилади ва тегишли ОТМларнинг ўқув жараёнига масофавий ўқитиш платформаси жорий этилади ҳамда зарур бўлган ускуналар билан жиҳозланади.
Шунингдек, 2020 йилда математика, кимё-биология, геология каби йўналишларда фундаментал ва амалий тадқиқотлар фаоллаштирилиб, олимларга барча шарт-шароитларни яратиш чоралари кўрилади.
Бундан ташқари, 1 сентябрга қадар илм-фаннинг ишлаб чиқариш билан фаол интеграциялашувини таъминлаш мақсадида фундаментал ва инновацион тадқиқотлар учун мақсадли грант маблағларини ажратиш механизми тубдан қайта кўриб чиқилади.
Эслатиб ўтамиз, Вазирлар Маҳкамаси ҳузуридаги Таълим сифатини назорат қилиш давлат инспекцияси матбуот котиби Феруза Мадраҳимова 17 апрель куни ўтказилган брифингда 2020 йил давлат дастурида янги ўқув йилидан бошлаб мамлакатдаги айрим олий таълим муассасаларида масофавий таълим бериш тизимини ташкил этиш кўзда тутилганини айтганди. Масофавий таълим бериш амалиёти жорий этилгач, республикада амалда мавжуд бўлган таълим шакли бўлганлиги учун масофавий таълим орқали ўқиб олинган ҳужжатлар белгиланган тартибда тан олинади.
Изоҳ (0)