“O‘zbekkino” MA “Sabr-u sadoqat”deb nomlangan besh qismli serialni yaratish va namoyish etish bo‘yicha maxsus loyihani amalga oshirish tashabbusi bilan chiqdi. Serial O‘zbekiston Qahramoni, O‘zbekiston xalq yozuvchisi Said Ahmad tavalludining 100-yillik yubileyiga bag‘ishlab mamlakatimizning o‘nta telekanalida efirga uzatiladi.
Kinoserial 1950—1955-yillarda yozuvchi va uning rafiqasi hayotida yuz bergan voqealarga asoslangan. Yosh oilaning yorqin umidlar va ulkan rejalarga to‘labaxtli va beg‘ubor hayoti bir onda ostin-ustun bo‘lib ketadi. Said Ahmad hibsga olinadi.
Endi bosh qahramonlarning hayoti qanday kechadi, ularni qanday sinovlar kutib turibdi, taqdir ularning muhabbatini qanday sinaydi? Serialni tomosha qilib, bu savollarning barchasiga javob topasiz.
“Avvaliga ‘Said bilan Saida’ filmida, so‘ngra ‘Sabr-u sadoqat’ serialida aks etgan voqealar haqiqatan ham Stalin qatag‘onining og‘ir yillarida ota-onam — O‘zbekiston xalq yozuvchisi Said Ahmad va shoira Saida Zunnunovaning hayotlarida yuz bergan. Filmga otamning avtobiografik qissalari, ota-onamning bir-biriga yo‘llagan maktublari hamda onam, shoira Saida Zunnunovaning kundaliklari asos qilib olingan. Ota-onamning hayoti va ijodi bilan bog‘liq barcha qo‘lyozmalar, hujjat va xatlar uy arxivimizda avaylab saqlanmoqda. Otamning 100-yillik yubileyiga atab ‘O‘zbekkino’da yaratilgan ushbu serial O‘zbekiston telekanallarida namoyish etilishidan bag‘oyat xursandman” — deb izoh berdi ssenariy muallifi, Said Ahmadning qizi Nodira Husanxo‘jayeva.
“Said bilan Saida” filmi asosida yaratilgan serial teletomoshabinlarni o‘sha tarixiy davrga, ijod va ilhom muhitiga yetaklaydi. Sevgi, xiyonat, pushaymonlik, kechirimlilik, sadoqat, ezgulik — tomoshabinlar film qahramonlari bilan birga ularning ko‘nglidan o‘tgan barcha kechinmalarni his qiladi.
Ta’kidlash lozimki, O‘zbekiston Prezidenti Shavkat Mirziyoyev “Adiblar xiyoboni”ning ochilishi chog‘ida mumtoz asarlarni o‘rganish, ularning hayoti va ijodiy yo‘li haqida kitoblar nashr etish, filmlar yaratish muhimligini ta’kidlab o‘tdi. Ushbu ko‘rsatmaga muvofiq Milliy agentlik tomonidan “Sabr-u sadoqat” teleserialining tayyorlanishi, o‘zbek xalqining yosh avlodini tarbiyalashdek muhim vazifaga hissa qo‘shayotganidan darak beradi.
Kinoserial 8-iyundan 12-iyungacha yurtimizning “O‘zbekiston”, “Madaniyat va ma’rifat”, “Mahalla”, “O‘zbekiston tarixi”,”, “Sevimli TV” (9-13-iyun) , Zo‘r TV, MY5, “Milliy TV”, “Uzbekistan-online.uz” telekanallarida, shuningdek, 20-iyun kuni “Kinoteatr” telekanalida namoyish etiladi.
Reklama huquqi asosida.
Izoh (0)