Bosh prokuratura tashabbusi va Samarqand viloyati prokuraturasi sa’y-harakati bilan 1 iyun — Xalqaro bolalar kuni munosabati bilan nogironligi bo‘lgan, uyda yakka tartibda ta’lim olayotgan kam ta’minlangan oilalar farzandlarini ijtimoiy qo‘llab-quvvatlash maqsadida ularning ijtimoiy holati o‘rganilgan. Bu haqida “Daryo”ga viloyat prokuraturasi axborot xizmati ma’lum qildi.
Ta’kidlanishicha, viloyatdagi 1668 nafar yakka tartibda ta’lim olayotgan bolaning ta’lim olishi, yashash sharoiti, mavjud muammolari va ehtiyojlari o‘rganilgan. 656 nafar bolaning sog‘lig‘i, ta’lim olishi va boshqa ijtimoiy masalalardagi muammolari aniqlanib, bir qismi joyida hal etilgan.
Homiylik va mahalliy budjet mablag‘lari hisobidan 105 nafar bolaga dori-darmon, 87 nafariga reabilitatsiya vositalari, ta’lim sifatini oshirish maqsadida 111 nafariga badiiy adabiyot va darsliklar, 98 nafariga o‘quv jihozlari olib berilgan. Kompyuter saboqlari uchun 23 dona noutbuk bilan ta’minlangan.
Ehtiyojmand oilalarni ijtimoiy qo‘llab-quvvatlash maqsadida 31 ta oilaga nafaqa, 27 tasiga esa moddiy yordam berilgan. 12 nafar ota-ona ishga joylashtirilib, 2 nafar bolaga logoped-o‘qituvchi biriktirilgan.
Davolanishga muhtoj bolalarning 121 nafari viloyatdagi tibbiyot markazlariga yotqizilgan. 17 nafari chuqurlashtirilgan tibbiy ko‘rikdan o‘tkazilgan.
Mazkur ishlarni tashkil etishda mas’uliyatsizlikka yo‘l qo‘ygan 163 nafar xodim intizomiy va ma’muriy javobgarlikka tortilgan.
Izoh (0)