Бош прокуратура ташаббуси ва Самарқанд вилояти прокуратураси саъй-ҳаракати билан 1 июнь — Халқаро болалар куни муносабати билан ногиронлиги бўлган, уйда якка тартибда таълим олаётган кам таъминланган оилалар фарзандларини ижтимоий қўллаб-қувватлаш мақсадида уларнинг ижтимоий ҳолати ўрганилган. Бу ҳақида «Дарё»га вилоят прокуратураси ахборот хизмати маълум қилди.
Таъкидланишича, вилоятдаги 1668 нафар якка тартибда таълим олаётган боланинг таълим олиши, яшаш шароити, мавжуд муаммолари ва эҳтиёжлари ўрганилган. 656 нафар боланинг соғлиғи, таълим олиши ва бошқа ижтимоий масалалардаги муаммолари аниқланиб, бир қисми жойида ҳал этилган.
Ҳомийлик ва маҳаллий бюджет маблағлари ҳисобидан 105 нафар болага дори-дармон, 87 нафарига реабилитация воситалари, таълим сифатини ошириш мақсадида 111 нафарига бадиий адабиёт ва дарсликлар, 98 нафарига ўқув жиҳозлари олиб берилган. Компьютер сабоқлари учун 23 дона ноутбук билан таъминланган.
Эҳтиёжманд оилаларни ижтимоий қўллаб-қувватлаш мақсадида 31 та оилага нафақа, 27 тасига эса моддий ёрдам берилган. 12 нафар ота-она ишга жойлаштирилиб, 2 нафар болага логопед-ўқитувчи бириктирилган.
Даволанишга муҳтож болаларнинг 121 нафари вилоятдаги тиббиёт марказларига ётқизилган. 17 нафари чуқурлаштирилган тиббий кўрикдан ўтказилган.
Мазкур ишларни ташкил этишда масъулиятсизликка йўл қўйган 163 нафар ходим интизомий ва маъмурий жавобгарликка тортилган.
Изоҳ (0)