Andijon viloyati hokimi Shuhrat Abdurahmonov “Hokim va yoshlar” loyihasi doirasida televideniye orqali yoshlar bilan onlayn muloqot o‘tkazdi, deya xabar berdi “Daryo” muxbiri Umidjon Mamarasulov.
Yoshlar ittifoqi viloyat kengashi axborot xizmatining xabar berishicha, muloqotda hokimga 4 mingga yaqin murojaat kelib tushgan. Ularning aksariyati bandlik, kredit olish, bo‘sh yer maydonlaridan foydalanish va xorijga chiqish masalalari bo‘lib, yoshlar shu borada yordam so‘ragan. Shuningdek, ta’lim, fan, axborot kommunikatsiyalari va boshqa yo‘nalishlarda o‘z takliflarini bildirgan.
Yoshlarning murojaat va takliflari shu kunning o‘zida o‘rganilib, ayrimlari ijobiy hal etilgan. Muddat talab qiladiganlari bo‘yicha esa tegishli boshqarmalarga topshiriqlar berilgan.
Shuhrat Abdurahmonov uchrashuv so‘ngida karantin holatidan kelib chiqib, oyning so‘nggi shanbasida ham jonli efir orqali onlayn muloqotga kirishib, yoshlar muammosini hal qilishga va’da bergan.
Izoh (0)