Oliy Majlis deputati hukumat Rossiya va Qozog‘iston chegarasida qolib ketganlarni olib kelishi kerakligi haqida fikr bildirdi

Oliy Majlis qonunchilik palatasining deputati, “Yuksalish” umummilliy harakati raisining o‘rinbosari Bobur Bekmurodov Rossiya hamda Qozog‘iston chegarasida O‘zbekistonga qayta olmayotgan fuqarolarga bu borada ko‘mak berish lozimligi haqida fikr bildirdi.

Deputatning yozishicha, ko‘plab xorijiy davlatlarda karantin tartibi e’lon qilingani sababli og‘ir sharoitda qolayotgan o‘zbekistonliklarni olib kelish hukumatning kun tartibidagi muhim masalalardan biri bo‘lib turibdi, to‘xtovsiz charter reyslarni tashkil qilish orqali minglab fuqarolar olib kelinmoqda.

Shuningdek, u bir necha haftalardan buyon yuzlab o‘zbekistonliklar Rossiya va Qozog‘iston chegarasida qolayotgani, ularning qilayotgan murojaatlari ko‘rmaganlikka olinayotganini ham tanqid qilgan.

“Albatta, bu fuqarolarimiz elchixona orqali, avvalo, o‘z oilalari salomatligini hurmat qilgan holda davlat tomonidan tashkil qilinayotgan rasmiy yo‘llar bilan qaytishi kerak edi. Ammo bu ijro hokimiyatida mazkur masala bo‘yicha kuzatilayotgan chorasizlikni oqlay olmaydi – har qanday vaziyatda ham O‘zbekiston fuqarolariga g‘amxo‘rlik ko‘rsatish, ularning hayotiy manfaatlarini himoya qilish kerak.

Hukumat tarkibida xorijda vaqtinchalik mehnat faoliyatini amalga oshirayotgan O‘zbekiston Respublikasi fuqarolari huquqini himoya qilish departamenti mavjud. Mazkur tuzilmaning qaytishga majbur bo‘lgan fuqarolarni olib kelish bo‘yicha aniq rejasi bormi? Ular bir necha haftadan beri ochiq dala sharoitida qolib ketayotgan o‘zbekistonliklarni qaytarishga to‘g‘ridan to‘g‘ri mas’ul bo‘lgan tashkilot sifatida qanday yechim taklif qiladi?

Qisqa muddatlar ichida birinchi navbatda evakuatsiyaga muhtoj bo‘lgan fuqarolar ro‘yxatini shakllantirish va ularni qaytarish bo‘yicha aniq rejalar e’lon qilinishi kerak. Bundan tashqari, xorijda bo‘lib turgan o‘zbekistonliklarni davlat tomonidan qo‘llab-quvvatlash bo‘yicha yondashuvlar haqida ham ma’lumot berilishi lozim.

O‘z navbatida, xorijdagi vatandoshlar ham hukumatning bu boradagi harakatlarini qo‘llab-quvvatlashi, cheklangan imkoniyat sharoitida e’tibor birlamchi ehtiyoji bo‘lganlarga berilishini to‘g‘ri tushunishi kerak bo‘ladi”, – deb yozgan deputat.