Andijon viloyatida 40 ming 724 ta oilada yashovchi 158 ming 126 nafar fuqaro ehtiyojmand sifatida ro‘yxatga olingan. Bu haqda Andijon davlat universitetida ehtiyojmand oilalarni kambag‘allikdan chiqarishga bag‘ishlangan seminarda ma’lum qilindi, deya xabar berdi “Daryo” muxbiri.
Ta’kidlanishicha, Xalq deputatlari tuman va shahar kengashlari tomonidan o‘tkazilgan xatlovga ko‘ra, Andijonda 158 ming 126 nafar fuqaro ehtiyojmand oilalarda istiqomat qiladi.
Ma’lumot berilishicha, mazkur oilalarni ijtimoiy muhofaza qilish sektor rahbarlari zimmasiga yuklatilgan.
Davlat rahbarining joriy yil 21—22-may kunlari viloyatga tashrifi chog‘ida bergan topshirig’i ijrosini ta’minlash maqsadida seminarda 64 ta sektor rahbari ishtirok etgan. Seminarda davomida sektor rahbarlariga o‘zlariga biriktirilgan hududlarda istiqomat qilayotgan ehtiyojmand oilalarni joriy yil oxirigacha kambag‘allikdan chiqarish bo‘yicha nazariy hamda amaliy ko‘rsatmalar berilgan.
30 soatga mo‘ljallangan mashg‘ulotlarda Vazirlar Mahkamasi majmualari rahbarlari, vazir o‘rinbosarlari, vazirliklar boshqarmalari boshliqlari, Davlat boshqaruvi akademiyasi professor-o‘qituvchilari tomonidan belgilangan muhim vazifalarni amalda bajarish mexanizmlari, tartiblari xususida aniq misollar keltirilgan.
O‘quv-seminar doirasida sektor rahbarlari Andijon, Xonobod shaharlari, Buloqboshi, Izboskan, Shahrixon, Jalaquduq tumanlaridagi qator korxonalar, fermer xo‘jaliklarida, shuningdek, aholi tomorqasidan unumli foydalanish bo‘yicha olib borilayotgan ishlarni tahlil qilib, mahorat mashg‘ulotlari o‘tkazgan.
Izoh (0)