AQSh prezidenti Donald Tramp “Katta yettilik” (G7) sammitining o‘tkazilish muddatini iyundan boshqa oyga, kamida sentabrga ko‘chirmoqchi ekani va anjumanga Rossiyani taklif qilmoqchiligini bildiridi. Bu haqda CNN telekanali xabar qilgan.
“Men ushbu sammitni boshqa muddatga qoldiraman, sababi G7 dunyoda sodir bo‘layotgan voqealarni yetarli darajada tahlil qila oladi deb hisoblamayman. Bu anchadan buyon ittifoqdosh bo‘lgan mamlakatlar guruhi”, — degan Tramp.
U sammitga yana 4 ta davlatni taklif qilmoqchiligini ham aytgan, bular: Rossiya, Avstraliya, Hindiston va Janubiy Koreya. Shu tariqa “Katta yettilik” G11’ga aylanadi.
Koronavirus pandemiyasi tufayli Tramp G7 rahbarlarining uchrashuvini bekor qilmoqchi va sammitni iyun oyida videokonferensaloqa tarzida o‘tkazmoqchi edi. Oq uy ushbu qarorni har bir mamlakatning koronavirus epidemiyasiga qarshi barcha resurslarini jalb qilishi uchun chiqarilganini bildirgan.
Ammo 18-mayda Tramp AQShda COVID-19 bilan kasallanganlar soni sezilarli darajada kamaygani va “Katta yettilik” uchrashuvini Kemp-Deviddagi rezidensiyada an’anaviy formatda o‘tkazish mumkinligini ma’lum qildi. Sammit 10-iyunda o‘tishi rejalashtirilgandi, biroq keyin anjuman muddati o‘zgarishi aytildi. Prezident maslahatchisi Robert O’Brayen uchrashuvning iyun oxirida o‘tkazilishi haqida gapirgan.
Rossiya Qrimni qo‘shib olganidan buyon G8 sammitlariga taklif qilinmay kelayotgandi. 2020-yilda sammit AQShda o‘tadi va 2019-yil avgustida Tramp Rossiya prezidenti Vladimir Putinning mehmon sifatida anjumanga taklif qilinishi mumkinligiga sha’ma qilgan. Lekin Amerika yetakchisining bayonotidan so‘ng AQSh kongressi vakillar palatasi Moskvani taklif qilish hamda G7 a’zoligiga qayta qabul qilishni inkor etuvchi rezolyutsiyani imzoladi. Kreml ham “Katta sakkizlik”ni qayta tuzish Rossiya uchun asosiy maqsadlar qatoriga kirmasligini ma’lum qilgan.
Ayni vaqtda xalqaro uyushmaga AQSh, Germaniya, Buyuk Britaniya, Italiya, Fransiya, Kanada va Yaponiya davlatlari a’zo hisoblanadi.
Izoh (0)