AQSh prezidenti Donald Tramp Crew Dragon fazo kemasi uchirilganidan keyin mamlakatning tarixdagi eng buyuk qurollarga ega bo‘lishini bildirdi. “Koinotda ikkinchi raqam bo‘lib, Yerda yetakchilik qilib bo‘lmaydi”, degan u.
“Butun dunyo bizga hasad qilmoqda va yaqin orada biz Marsga odamlarni chiqaramiz, shu tariqa AQSh tarix hali ko‘rmagan buyuk qurollarga ega bo‘ladi”, — deydi Tramp.
Uning so‘zlariga ko‘ra, AQSh kosmosda “dunyo yetakchisi” maqomini qaytarib olgan. SpaceX kemasining uchirilishi oxirgi “50 yil ichida qilingan birinchi kosmik murojaat” va “yulduzlar tomon qo‘yilgan g‘alabali odim” bo‘ladi, degan Tramp.
AQShda “super-puper” raketalarni yaratish ishlari boshlangan va ular mavjud qurollardan 17 baravarga kuchli, degandi Tramp may o‘rtalarida mamlakat fazo kuchlarining tantanali marosimida.
“Koinot mudofaa va boshqa masalalarda AQShning kelajagi bo‘ladi”, — deya qo‘shimcha qilgan u.
2019-yil mart oyida Tramp Oyga nima qilib bo‘lsa ham Amerika astronavtlarini yuborishi lozimligini qayd etgan va NASA’ga besh yil ichida o‘z buyrug‘ini bajarishni topshirgan. 2020-yil fevralida kongressdan koinotga uchadigan kemalar uchun mablag‘ ajratishni so‘ragan va AQShning Oyda va Marsda o‘z bayrog‘ini tikadigan birinchi mamlakat bo‘lishini istashi haqida gapirgandi.
30-mayda Ilon Maskning SpaceX kompaniyasi astronavtlarni koinotga uchirgan. Falcon 9 raketasi Crew Dragon kemasi bilan birga Florida shtatidagi Kennedi kosmik markazidagi maydonchadan uchirilgan. Kema bortida astronavtlar Bob Benken va Duglas Xyorli Xalqaro kosmik stansiyaga parvoz qilgan.
AQSh uchun bu 2011-yili Space Shuttle dasturi tugatilganidan so‘ng mamlakatning o‘z kemasida amalga oshirilgan ilk boshqariladigan kosmik parvozdir.
Izoh (0)