Rossiyalik milliarder Alisher Usmonov Namangan viloyatidagi qariyb 5 ming oilaga jami 12,5 milliard so‘mlik moliyaviy ko‘mak ko‘rsatdi. Bu haqda “Daryo” muxbiri Azizbek Abduvaliyev xabar bermoqda.
“Saxovat va ko‘mak” umumxalq harakati doirasida Namangan shahridagi 3000, Chust tumanidagi 1000, Namangan tumanidagi 997 ta xonadon yo‘qlangan. O‘rganishlar davomida yakka-yolg‘iz, boquvchisini yo‘qotgan, nogironlari bor oilalar tanlab olingan.
Milliarder tomonidan ajratilgan mablag‘ Milliy bank plastik kartalariga o‘tkazilib, mahalla fuqarolar yig‘inlari raislari, sektor vakillari va bank xodimlari tomonidan mazkur oilalar vakillariga yetkazib berilgan.
Jumladan, Namangan shahridagi “G‘ishtko‘prik” mahallasida 30 ta oilaga ichida 2,5 million so‘m mablag‘i bo‘lgan plastik kartalar tarqatilgan. Birgina shu mahallaga ko‘rsatilgan yordamning umumiy summasi 75 million so‘mni tashkil etgan.
“Turmush o‘rtog‘im ancha yillar oldin vafot etgan, uch qiz bilan qolganman. Kattasini uzatdim, kichiklari 18 va 14 yoshda. Oshxonada ishlardim, karantin sababli u yer ham vaqtinchaga yopildi. Shunday qiyin paytda bu yordam bizning oila uchun ayni muddao bo‘ldi. Muborak oyda, Hayit bayrami arafasida bunga qo‘l urganlarni duo qilamiz”, — deydi ushbu mahallada yashovchi O‘g‘ilxon To‘raboyeva.
Mavzuga doir:
- Milliarder Alisher Usmonov Andijonda mingta oilaga 2,5 mln so‘mdan moliyaviy ko‘mak berdi
- Alisher Usmonov ajratgan 10 mln dollar suv toshqinidan jabr ko‘rgan sirdaryoliklarga Ramazon Hayitigacha tarqatiladi
- Sardobadagi falokatdan jabr ko‘rgan har bir xonadonga Shavkat Mirziyoyev nomidan 40 mln so‘mdan berildi
Izoh (0)