АҚШ Россия президенти Владимир Путин ва Шимолий Корея етакчиси Ким Чен Иннинг соғлиғидан хавотир олишга асос бўлувчи ҳеч қандай сабаб кўрмаяпти. «РБК»нинг ёзишича, бу ҳақда журналистларга Дональд Трампнинг миллий хавфсизлик бўйича маслаҳатчиси Роберт О’Брайен маълум қилган.
«Президент (Трамп) ўтган ҳафтада Путин билан суҳбатлашган эди. У яхши кайфиятда ва тетик эди. Бизда бунинг акси деб тахмин қилиш учун сабаб йўқ», — деган О’Брайен.
Бундан ташқари АҚШ ҳукумати КХДР етакчиси Ким Чен Ин ҳам саломат, деган фикрда. «У ўғит заводи очилишида ленталарни кесганди, демак афтидан, унда ҳаммаси жойида», — дея қўшимча қилган Трамп маслаҳатчиси.
Эслатиб ўтамиз, апрель ойида CNN телеканали Ким Чен Иннинг юраги операция қилингани ва соғлиғи ёмонлашгани ҳақида хабар берганди. Унда Ким Чен Ин сўнгги марта 11 апрель куни оммага кўриниш бергани, шунингдек, у Ким Ир Сен туғилганига 108 йил тўлиши муносабати билан 15 апрелдаги маросимни ўтказиб юборгани таъкидланган. Япониянинг Shukan Gendai нашри у операциядан кейин оғир аҳволда эканини ёзган. Шундан сўнг хориждаги бир қатор ОАВда Шимолий Корея етакчисининг соғлиғи хавф остида экани ҳақидаги хабарлар тарқалишига сабаб бўлган.Бироқ АҚШ президенти Дональд Трамп Ким Чен Иннинг соғлиғи ёмонлашгани тўғрисидаги маълумотлар хато эканлигини билдириб, CNN’га доим ҳам ишонавермаслигини айтган. 27 апрель куни Жанубий Корея президенти маслаҳатчиси КХДР етакчиси соппа-соғ эканлигини маълум қилганди.
Путин 5 май куни Ким Чен Инни «1941—1945 йилларда содир бўлган Улуғ Ватан урушида эришилган ғалабанинг 75 йиллиги» юбилей медали билан тақдирлади. Медални Россия элчиси Александр Мацегор КХДР ташқи ишлар вазири Ли Сон Гвонга топширган.
12 май куни эса Россия президенти матбуот котиби Дмитрий Песков эса коронавирусга чалиниб, касалхонага ётқизилганини маълум қилганди. У сўнгги марта 30 апрелда Владимир Путин раислиги бўлиб ўтган йиғилишда оммага кўриниш берган. Путиннинг ўзи билан эса у тахминан бир ой аввал бевосита кўришиб, мулоқот қилган.
Изоҳ (0)