Buyuk Britaniyani Fransiya va Belgiya bilan bog‘laydigan tezyurar poyezdlarda niqob taqish barcha yo‘lovchilar uchun majburiy etib belgilanadi, deb yozmoqda Travel & Leisure. Bu tartibga bo‘ysunmagan mijozlarga xizmat ko‘rsatilmasligi mumkin.
Bundan tashqari, Fransiya va Belgiyaga sayohat qilayotgan niqobsiz fuqarolar har ikki davlatda jarimaga tortilishi mumkin.
“Iltimos, yo‘lga chiqayotganingizda niqobingiz borligiga ishonch hosil qiling. Burun va og‘izni samarali berkitib turadigan istalgan niqobdan foydalanish mumkin”, — deyiladi Yevropadagi tezyurar poyezdda yo‘lovchilar tashish bilan shug‘ullanuvchi kompaniya xabarida.
Qayd etilishicha, ayni paytda qatnov jadavaliga ko‘ra, faqat 4 ta: London va Parij hamda London va Bryussel o‘rtasidagi poyezd qatnovlari ishlab turibdi.
Biroq Yevropaning bir necha davlatlari yaqin kunlarda karantin choralarini bekor qilishga tayyorlanmoqda. Fransiya 11-maydan karantinni bekor qilishni rejalashtirgan bo‘lsa, Belgiyada shu kuni do‘konlar ochilishni boshlaydi, maktablar esa bundan sal kechroq ishga tushadi.
Avstriyada 14-apreldan boshlab koronavirus tarqalishining oldini olish maqsadida joriy etilgan cheklovlarni sekin-asta bekor qilish boshlandi. Chexiya Yevropada birinchilardan bo‘lib chegaralarini ochib, fuqarolarga chet elga chiqishga ruxsat berdi.
Mavzuga doir: Karantindan chiqayotgan Italiya — suratlarda
Izoh (0)