Rossiyalik milliarder Dmitriy Bosov o‘z joniga qasd qildi. Bu haqda uning tanishlari va kompaniyalaridan birining boshqaruvchisiga tayanib, “RBK” xabar berdi.
Ma’lum qilinishicha, milliarder 6-mayga o‘tar kechasi o‘zini o‘ldirgan. Biznesmenning o‘lganini uning boshqa bir tanishi ham tasdiqlagan.
Rossiya Ichki ishlar vazirligining Moskva viloyati bo‘yicha bosh boshqarmasi tomonidan xabar berilishicha, politsiya Moskva viloyatidagi Bosov yashagan Usovo qishlog‘iga chaqiruv bilan borgan. Milliarder o‘qotar quroldan olingan jarohat natijasida vafot etgan.
Dastlabki ma’lumotlarga ko‘ra, milliarderning jasadi 6-may kuni uning yaqinlari tomonidan Usovo qishlog‘idagi uyida topilgan. Uning boshida o‘qotar quroldan qolgan jarohat bo‘lgan. Uning jasadi yonida “Glock 19 gen 4” to‘pponchasi topilgan.
Bosovning tanishlaridan birining aytishicha, u so‘nggi paytlarda o‘zini g‘alati tutgan, shuningdek, unda tez-tez mojarolar bo‘lib turgan. Yil boshidan buyon u barcha aktivlarni o‘z nomiga o‘tkazishni, xodimlarni ishdan bo‘shatishni boshlagan. May oyiga kelib barchasi murakkablashib ketgan, barcha uni aktivlarni sotishga tayyorlayapti, deb o‘ylagan.
Dmitriy Bosov “Sibantratsit” kompaniyasini nazorat qiluvchi “Alltek” guruhining eng yirik aksiyadori va direktorlar kengashi rahbari bo‘lgan. “Sibantratsit” kompaniyasi antratsit qazib olish va eksport qilish bo‘yicha dunyoda yetakchi kompaniya va Rossiyada qazilma ko‘mir ishlab chiqaruvchi eng yirik kompaniya hisoblanadi. Shuningdek, Bosov “VostokUgol” singari bir nechta ko‘mir kompaniyasining egalaridan biri bo‘lgan. Forbes jurnali Dmitriy Bosovning boyligini 1,1 milliard dollarga baholagan, rossiyalik milliarderlarning 2020-yil reytingiga ko‘ra, Bosov 86-o‘rinda turgan.
Izoh (0)