Qashqadaryo viloyatining Kasbi tumanidagi shifoxonada faoliyat yurituvchi hamshira bir oylik maoshini qishlog‘idagi ehtiyojmand oilalar uchun sarfladi. Bu haqda “Daryo”ga viloyat sog‘liqni saqlash boshqarmasi axborot xizmati rahbari Nuriddin Egamov ma’lum qildi.
“Husnora Arabova Kasbi tumanidagi markaziy shifoxonada navbatchi hamshira bo‘lib ishlaydi. U karantinda qiynalgan oilalarni qo‘llab-quvvatlash maqsadida bir oylik maoshi — 700 ming so‘m pulga oziq-ovqat mahsulotlari xarid qilib, o‘zi tug‘ilib o‘sgan Komilon qishlog‘idagi 12 ta ehtiyojmand oilaga tarqatdi”, — deydi Nuriddin Egamov.
Ma’lum bo‘lishicha, hamshira dastlab viloyatda koronavirusga chalingan bemorlarni davolashda ishtirok etish taklifi bilan chiqqan. Ammo bu niyati amalga oshmagan.
Nuriddin Egamovning aytishicha, o‘zgalar haqida qayg‘urgan hamshira Husnora Arabova kreditga uy olgan bo‘lib, ayni kunda kredit to‘lab keladi.
“Ona-bola kengashib qarasak, bu oy anchagina mablag‘imiz ortyapti. Chunki karantin munosabati bilan kredit to‘lovlari bir necha oyga kechiktirildi. Shuning uchun sinovli kezlarda, qutlug‘ kunlarda biroz qiynalgan hamqishloqlarimga qo‘limdan kelganicha yordam berishga qaror qildim”, — deydi hamshira.
Izoh (0)