Қашқадарё вилоятининг Касби туманидаги шифохонада фаолият юритувчи ҳамшира бир ойлик маошини қишлоғидаги эҳтиёжманд оилалар учун сарфлади. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов маълум қилди.
«Ҳуснора Арабова Касби туманидаги марказий шифохонада навбатчи ҳамшира бўлиб ишлайди. У карантинда қийналган оилаларни қўллаб-қувватлаш мақсадида бир ойлик маоши — 700 минг сўм пулга озиқ-овқат маҳсулотлари харид қилиб, ўзи туғилиб ўсган Комилон қишлоғидаги 12 та эҳтиёжманд оилага тарқатди», — дейди Нуриддин Эгамов.
Маълум бўлишича, ҳамшира дастлаб вилоятда коронавирусга чалинган беморларни даволашда иштирок этиш таклифи билан чиққан. Аммо бу нияти амалга ошмаган.
Нуриддин Эгамовнинг айтишича, ўзгалар ҳақида қайғурган ҳамшира Ҳуснора Арабова кредитга уй олган бўлиб, айни кунда кредит тўлаб келади.
«Она-бола кенгашиб қарасак, бу ой анчагина маблағимиз ортяпти. Чунки карантин муносабати билан кредит тўловлари бир неча ойга кечиктирилди. Шунинг учун синовли кезларда, қутлуғ кунларда бироз қийналган ҳамқишлоқларимга қўлимдан келганича ёрдам беришга қарор қилдим», — дейди ҳамшира.
Изоҳ (0)