Sirdaryo viloyatidagi Sardoba suv omborida ro‘y bergan avariya sabab evakuatsiya qilingan ko‘plab fuqarolar zarur hujjatlarsiz qolgani, ular Davlat xizmatlari markazlari tomonidan qayta rasmiylashtirib berilishi xabar berilgan edi.
Davlat xizmatlari agentligi matbuot xizmatining “Daryo”ga ma’lum qilishicha, suv toshqinidan jabr ko‘rganlarning yo‘qolgan hujjatlari dublikatlarini topshirish boshlandi.
Halokat yuz bergan kunning ertasigayoq agentlikning Sirdaryo viloyati boshqarmasi, uning tuman (shahar) Davlat xizmatlari markazlari va FHDYo bo‘limlari mas’ul xodimlaridan iborat tarkibda ishchi guruhlari tuzilib, Sardoba suv ombori toshqinidan zarar ko‘rgan Sardoba, Oqoltin va Mirzaobod tumani aholisining yashash sharoitlarini o‘rganish va fuqarolarning tug‘ilganlik, nikoh va boshqa hujjatlarining butligi, yo‘qolgan bo‘lsa, ularni tiklash bo‘yicha harakatlar operativ tarzda olib borildi.
Qayd etilishicha, 6-mayning o‘zida Guliston shahridagi Olimpiya zahiralari kolleji, Guliston akademik litseyi, Guliston musiqa va san’at maktab-internati, Guliston tibbiyot kolleji binolariga evakuatsiya qilingan fuqarolardan 60 nafariga takroriy guvohnomalar topshirilgan.
Qayta tiklangan hujjatlar hech qanday to‘lovlarsiz rasmiylashtirilib berilmoqda.
Eslatib o‘tamiz, Sirdaryo viloyatidagi Sardoba suv omborida 1-may tongida yuz bergan falokatdan so‘ng 70 mingga yaqin fuqaro xavfsiz hududlarga ko‘chirilgani, kamida 56 kishi turli darajada tan jarohati olib, kasalxonalarga yotqizilgani, 300 kishi vertolyotlar vositasida qutqarilgani haqida xabar berilgan edi.
Ayni paytda Sirdaryo viloyatining suv bosgan joylarida vaziyat tobora yaxshilanmoqda, toshqin bo‘lgan hududning katta qismida suv kamaygan. Jizzaxning Do‘stlik tumaniga evakuatsiya qilingan 900 nafarga yaqin sirdaryoliklar vaziyat barqarorlashgani uchun o‘z uylariga qaytarilgan. Viloyatining Oqoltin va Mirzaobod tumanlaridagi aholi yashash punktlariga ham 16,2 ming kishi uylariga qaytib keldi.
Izoh (0)