Xitoy Xalq Respublikasi tashqi ishlar vaziri Van I Braziliya, Rossiya, Hindiston, Janubiy Afrika Respublikasi davlatlarini (BRIKS) koronavirus epidemiyasiga qarshi kurashda dunyo mamlakatlarining sa’y-harakatlarini muvofiqlashtirayotgan Jahon sog‘liqni saqlash tashkilotini qo‘llab-quvvatlashga chaqirdi.
“BRIKS mamlakatlari BMT mexanizmlarini qo‘llab-quvvatlashi va ularning koronavirus epidemiyasiga qarshi kurashda samarali bo‘lishini ta’minlashi lozim. JSST epidemiyaga qarshi kurashda mamlakatlarning global hamkorligini muvofiqlashtiruvchi asosiy kuch hisoblanadi”, — degan Van I BRIKS davlatlari tashqi ishlar vazirlari ishtirok etgan onlayn-formatdagi sammitda.
Uning so‘zlariga ko‘ra, JSSTni qo‘llab-quvvatlash rivojlanayotgan mamlakatlarning, ayniqsa, Afrika qit’asi davlatlarining epidemiyaga qarshi kurashida samara beradi.
“JSSTni qo‘llab-quvvatlash yanada ko‘proq insonlar hayotini saqlab qolishga, ko‘proq bemorlarning sog‘ayishiga, kasallikka qarshi kurashda va butun dunyoning epidemiyaga qarshi birlashuviga xizmat qiladi. Insoniyat koronavirus bilan kurashayotgan ayni pallalarda JSST obro‘sining kamayishi va yana boshqa har qanday choralar tashkilotning samarali ishlashiga to‘sqinlik qiladi va tashabbuslar jahon hamjamiyati tomonidan qo‘llab-quvvatlanmasligiga sabab bo‘ladi”, — degan Van I.
Shuningdek, u Xitoyning so‘nggi vaqtlarda JSST uchun 50 million AQSh dollari miqdoridagi mablag‘ ajratgani va ushbu pullar rivojlanayotgan davlatlarning ehtiyojlarini qondirishga umid bildirganini ta’kidlagan.
Xitoy tashqi siyosatga mas’ul idorasining rahbari inqiroz oqibatida kuzatilayotgan kamchiliklarni bartaraf qilish uchun sog‘liqni saqlash sohasida jamoatchilik global boshqaruvini kuchaytirish lozimligini qayd etgan.
Izoh (0)