Birlashgan Millatlar Tashkiloti koronavirus pandemiyasiga qarshi kurashda davlatlarga to‘siq bo‘layotgan sanksiyalarni olib tashlashga chaqiradi. Bu haqda BMT bosh kotibi Antoniu Guterrishning bayonotiga tayanib, “RIA Novosti” xabar berdi.
“Koronavirus kontekstida biz ushbu pandemiyaga qarshi davlatlarning ko‘rsatadigan reaksiyasiga zarar yetkazishi mumkin bo‘lgan barcha sanksiyalarni olib tashlashga chaqiramiz. Men o‘ylaymanki, sanksiyalar rejimi oqilona bo‘lishi va barchamizdagi global siyosat maqsadlariga putur yetkazmasligi kerak”, — dedi Guterrish.
Avvalroq Rossiya prezidenti Vladimir Putin G20 davlatlariga savdo urushlari va xalqaro sanksiyalardan voz kechishni taklif qilgandi. Yevropa Ittifoqi koronavirus sabab Suriya, Venesuela, Eron va KXDRdan sanksiyalarni olib tashlashga chaqirgandi.
Shuningdek, BMT barcha mamlakatlar hukumatini pandemiyadan so‘ng yangi iqtisodiyotni yaratish va ish o‘rinlarini ko‘paytirishga chaqirdi.
“Avvalgi odatiy hayot tarziga qaytib bo‘lmaydi. Shu hafta va oylarda hukumatlar tomonidan moliyaviy manbalarni ommaviy ravishda qayta taqsimlash kelajakda kutilayotgan o‘zgarishlar uchqunidir”, — deb ta’kidlagan tashkilot mutaxassislari.
Ularning prognoziga ko‘ra, pandemiya sharoitida 2020-yilning ikkinchi choragidayoq 195 million kishi ishsiz qoladi, ishsizlik va qashshoqlik darajasi yuqori bo‘lishi mumkin. BMT ekspertlarining fikricha, COVID-19 epidemiyasi tufayli yuzaga kelgan inqirozdan kichik va o‘rta korxonalar, qishloq xo‘jaligi ishchilari, o‘z-o‘zini ish bilan ta’minlaydiganlar va mehnat muhojirlari ko‘proq jabrlanishi mumkin.
Izoh (0)