Yevropaning 5 ta mamlakatidan bo‘lgan mehnatga layoqatli fuqarolarning 30 milliondan ortig‘i koronavirus pandemiyasi paytida pulsiz qolishdan xavotirlanib yordam puli so‘radi, deb xabar bermoqda Financial Times. Ular kompensatsiya to‘lovlarini olish uchun murojaat qilgan.
Dasturga muvofiq, davlat xodimlarning ish haqini saqlab qolgan holda ularga qisqa muddatli ta’til beradi. Bu pandemiya davrida ishsizlik darajasi keskin oshishining oldini olish maqsadida qilingan. Gap iqtisodiy rivojlangan Germaniya, Fransiya, Buyuk Britaniya, Italiya va Ispaniya haqida ketmoqda. Ularda mehnatga layoqatli fuqarolarning beshdan bir qismi moliyaviy yordam so‘rab murojaat qilgan.
Qayd etilishicha, bu eng qimmat dastur bo‘lib, prognozlarga ko‘ra, yuqoridagi davlatlar umumiy hisobda 100 milliard yevrodan ortiq mablag‘ sarflashiga to‘g‘ri keladi. Biroq Ispaniya va Buyuk Britaniya kabi davlatlar ishsizlikning kuchayishiga yo‘l qo‘ymaslik uchun bunday qo‘llab-quvvatlash choralari uzoq davom etmasligidan xavotirda. Germaniyadagi ishchilar esa hukumat tomonidan beriladigan pulga 2 oydan ortiq yashay olmasliklaridan qo‘rqmoqda.
Iqtisodchilarning ta‘kidlashicha, bu safar iqtisodiy inqiroz avvalgi inqirozlarga qaraganda ancha og‘ir bo‘lib, kichik biznes: restoranlar, mehmonxonalar va do‘konlar ishiga salbiy ta’sir ko‘rsatdi. Ish beruvchilar shunchaki xodimlarni ishdan bo‘shatib yuborishi yoki o‘z bizneslarini yopishi mumkin.
Ispaniya hukumati may oyida koronavirus pandemiyasidan ko‘proq zarar ko‘rgan fuqarolarga to‘lanadigan imtiyozlar miqdorini belgilashni rejalashtirmoqda. Mamlakat rasmiylari buni 500 yevro miqdorida belgilashni muhokama qilmoqda.
Avvalroq BMT koronavirus pandemiyasi sabab 30 ga yaqin davlatda ocharchilik bo‘lishi mumkinligini, barcha mamlakatlar hukumatini pandemiyadan so‘ng yangi iqtisodiyotni yaratish va ish o‘rinlarini ko‘paytirishga chaqirgani haqida xabar berilgan edi.
Izoh (0)