Хитой Халқ Республикаси ташқи ишлар вазири Ван И Бразилия, Россия, Ҳиндистон, Жанубий Африка Республикаси давлатларини (БРИКС) коронавирус эпидемиясига қарши курашда дунё мамлакатларининг саъй-ҳаракатларини мувофиқлаштираётган Жаҳон соғлиқни сақлаш ташкилотини қўллаб-қувватлашга чақирди.
«БРИКС мамлакатлари БМТ механизмларини қўллаб-қувватлаши ва уларнинг коронавирус эпидемиясига қарши курашда самарали бўлишини таъминлаши лозим. ЖССТ эпидемияга қарши курашда мамлакатларнинг глобал ҳамкорлигини мувофиқлаштирувчи асосий куч ҳисобланади», — деган Ван И БРИКС давлатлари ташқи ишлар вазирлари иштирок этган онлайн-форматдаги саммитда.
Унинг сўзларига кўра, ЖССТни қўллаб-қувватлаш ривожланаётган мамлакатларнинг, айниқса, Африка қитъаси давлатларининг эпидемияга қарши курашида самара беради.
«ЖССТни қўллаб-қувватлаш янада кўпроқ инсонлар ҳаётини сақлаб қолишга, кўпроқ беморларнинг соғайишига, касалликка қарши курашда ва бутун дунёнинг эпидемияга қарши бирлашувига хизмат қилади. Инсоният коронавирус билан курашаётган айни паллаларда ЖССТ обрўсининг камайиши ва яна бошқа ҳар қандай чоралар ташкилотнинг самарали ишлашига тўсқинлик қилади ва ташаббуслар жаҳон ҳамжамияти томонидан қўллаб-қувватланмаслигига сабаб бўлади», — деган Ван И.
Шунингдек, у Хитойнинг сўнгги вақтларда ЖССТ учун 50 миллион АҚШ доллари миқдоридаги маблағ ажратгани ва ушбу пуллар ривожланаётган давлатларнинг эҳтиёжларини қондиришга умид билдирганини таъкидлаган.
Хитой ташқи сиёсатга масъул идорасининг раҳбари инқироз оқибатида кузатилаётган камчиликларни бартараф қилиш учун соғлиқни сақлаш соҳасида жамоатчилик глобал бошқарувини кучайтириш лозимлигини қайд этган.
Изоҳ (0)