Toshkent shahar aholisi talab va ehtiyoji hamda xizmat ko‘rsatish sohasida faoliyat yuritayotgan tadbirkorlarning murojaatlarini o‘rganish xulosalaridan kelib chiqib, poytaxtdagi kimyoviy tozalash muassasalari faoliyatini qayta yo‘lga qo‘yishga ruxsat berildi. Bu haqda poytaxt hokimligi xabar bergan.
Xabarga ko‘ra faoliyatini qaytadan boshlaydigan kimyoviy tozalash muassasalari karantin talablari va ishni qayta tiklash bo‘yicha maxsus komissiya tomonidan ishlab chiqilgan tavsiyalarga to‘liq amal qilishi talab etiladi. Shuningdek, ish boshlashdan avval muassasa hamda xizmatga jalb qilingan xodimlar SEOM tekshiruvidan o‘tishi shart.
Shuningdek, aholi zarur bo‘lmaganda ko‘chaga chiqmasligi lozimligi talabidan kelib chiqib, bunday turdagi tashkilotlarga buyurtmalarni olib ketish hamda yetkazib berishni tashkil qilish tavsiya etiladi. Ya’ni kimyoviy tozalash muassasalari endi aholiga xizmat ko‘rsatishda buyurtmani uydan olib kelish va uni manzilga eltib berishni ham inobatga olgan holda xizmat ko‘rsatadi.
Mavzuga doir: Toshkentda karantindan so‘ng ishsiz yoshlar soni uch baravarga ko‘payishi taxmin qilinmoqda
Izoh (0)