Qozog‘iston mehnat migrantlarini himoya qilish bo‘yicha O‘zbekiston bilan bitimni ma’qulladi

Qozog‘iston prezidenti Qosim-Jo‘mart To‘qayev O‘zbekiston bilan mehnat faoliyati va mehnat migrantlari huquqlari to‘g‘risidagi bitimni tasdiqlovchi qonunni imzoladi. Bu haqda mamlakat prezidenti matbuot xizmati xabar berdi.

Hujjatdan maqsad migratsiya oqimini tartibga solish va har ikki respublika hududida noqonuniy mehnat faoliyatining oldini olish hisoblanadi.

Shuningdek, mehnat migrantlariga o‘z mehnat majburiyatlarini bajarish chog‘ida olgan jarohati, kasbiy kasallikka chalingani yoki sog‘lig‘iga yetkazilgan boshqa zarar uchun kompensatsiya to‘lash, shuningdek, ularni tibbiy yordamning kafolatlangan hajmi bilan ta’minlash ko‘zda tutilgan.

Bundan tashqari, mehnat migrantlari pedagogik, tibbiy yoki farmatsevtik faoliyati bilan shug‘ullanganda tegishli ma’lumotni olgan shaxslar mehnat qilayotgan davlat qonunchiligida belgilangan tartibda ta’lim to‘g‘risidagi hujjatlarni tan olish tartibidan o‘tadi.

Avvalroq Senat raisi Tanzila Norboyeva o‘zbekistonlik migrantlar masalasida rossiyalik hamkasbidan yordam so‘ragani, Rossiyada og‘ir hayot sharoitlariga tushib qolgan o‘zbekistonliklarga yordam berish uchun “Saxovat” markazi tashkil etilgani, Turkiyaning Istanbul shahrida og‘ir vaziyatga tushib qolgan o‘zbekistonliklarga yordam aksiyasi uyushtirilgani xabar berilgan edi.