AOKA huzuridagi shtabda 15-aprel kuni Adliya vazirligi axborot xizmati rahbari Sevara O‘rinboyeva bilan brifing o‘tkazildi. Unda karantin va “o‘zini yakkalash” tushunchalari va ularning farqiga to‘xtalib o‘tdi.
Uning ta’kidlachiga, “o‘zini yakkalash” bu — karantinga oid chora-tadbirlarning bir qismi. Karantinga olingan shaxslar tibbiyot yoki sanitariya-epidemiologiya xodimlarining doimiy kuzatuvi va nazorati ostida bo‘ladi. “O‘zini yakkalash” hayot tarzida esa fuqaro tibbiy kuzatuv yoki nazorat ostida bo‘lmaydi.
“O‘zini yakkalash” bo‘yicha o‘rnatilgan karantin cheklovlarini buzish epidemiyalarga qarshi kurash qoidalarini buzish hisoblanadi va buning uchun fuqarolarga 4 million 460 ming so‘mdan 6 million 690 ming so‘mgacha, mansabdor shaxslarga esa 6 million 690 ming so‘mdan 11 million 150 ming so‘mgacha miqdorda jarima solishga sabab bo‘ladi.
Eslatib o‘tamiz, O‘zbekistonning yirik shaharlarida “o‘zini yakkalash” tartibi 6-apreldan majburiy joriy etildi. Unga ko‘ra, shaxsning o‘zining yashash hududidagi savdo nuqtalarida birinchi galdagi hayotiy zarur bo‘lgan ehtiyojlari (oziq-ovqat, dori-darmon, tibbiy buyum va vositalarni xarid qilish va boshqalar) uchun va shifokor ko‘rigiga murojaat etishdan boshqa maqsadlarda chiqishi qat’iyan cheklandi.
Harakatlanishda hamda savdo do‘konlari va boshqa joylarda 2 metrlik ijtimoiy masofani saqlash talab etiladi. 65 yoshdan yuqori yoshda va surunkali kasalligi bo‘lgan fuqarolar o‘z uylaridan o‘ta zaruratsiz tashqariga chiqishi qat’iyan man etildi.
O‘zbekistonda karantinning qachon tugashi esa noma’lum. U Respublika maxsus komissiyasi qaroriga ko‘ra amalga oshiriladi. Ayni vaqtda yolg‘iz keksalar va nogironligi bo‘lgan shaxslarga oziq-ovqat va dori-darmon karantin davri oxirigacha bepul yetkazib beriladi.
Izoh (0)