Sirdaryo viloyatida koronavirus infeksiyasini yuqtirganlikda gumon qilinib, karantinga olingan 140 nafar Xitoy fuqarosi ushbu kasallikka chalinmaganligi aniqlandi, deb xabar bermoqda O‘zA.
O‘zbekistonda koronavirus pandemiyasi qayd etilgach, Prezident tashabbusi bilan respublikaning barcha hududlarda ushbu dardga chalinganlikda gumon qilingan fuqarolarni alohidalashtirish (izolatsiya) maqsadida ko‘plab karantin muassasalari tashkil etilgan edi.
Qayd etilishicha, Sirdaryo tumani hududidagi Wang da group qo‘shma korxonasida xuddi shunday muassasalardan biri tashkil etilib, u yerda Xitoydan charter reyslarda O‘zbekistonga kelgan, O‘zbekiston—Xitoy qo‘shma korxonalarida faoliyat ko‘rsatayotgan 140 nafar xitoylik tibbiy nazorat uchun joylashtirilgandi.
Ular 14 kun davomida sirdaryolik 5 nafar oliy, o‘rta va kichik tibbiyot xodimlari nazoratida bo‘lgan. Bu davr davomida ulardan 2 marotaba tahlil olinib, Respublika va viloyat sanitariya-epidemiologik osoyishtalik markazi qoshidagi virusologiya laboratoriyasida tahlildan o‘tkazilgan va mazkur laboratoriya mutaxassislarining yakuniy xulosalariga ko‘ra, ularda koronavirus alomatlari qayd etilmagan.
Xabarda aytilishicha, hududdagi qo‘shma korxonalarda faoliyat yuritayotgan 140 nafar Xitoy fuqarosi sog‘lom ekanligi uchun ular o‘zlari mehnat qilayotgan muassasalarga kuzatib qo‘yilgan.
O‘zbekistonda 15-aprel holatiga ko‘ra, koronavirus infeksiyasini yuqtirib olganlar soni 1302 nafarni tashkil etmoqda. Shu kungacha kasallanganlarning to‘rt nafari vafot etdi, 107 nafari esa sog‘ayib, reabilitatsiyaga olindi. Bundan tashqari, xorijda kamida 23 o‘zbekistonlik koronavirusga chalingan, ularning 3 nafari vafot etgan.
Izoh (0)