Bosh prokuraturaning Ichki ishlar organlarida qonunchilik ijrosi ustidan nazorat boshqarmasi boshlig‘i Sodiqjon Berdialiyev AOKAda bo‘lib o‘tgan brifingda mas’ul tashkilotlarning xodimlaridan iborat tezkor-tergov va tahliliy guruh tomonidan qoidabuzarliklar bo‘yicha aniqlangan ma’lumotlarni keltirib o‘tdi.
Jumladan, 65 yoshdan yuqori keksalarning uydan chiqmasliklari qarori yuzasidan 3261 nafar keksa yoshdagi fuqaro tomonidan ham karantin qoidalarini buzish holatlari qayd etilgani ta’kidlandi.
Mavzuga doir: O‘zbekistonning yirik shaharlarida “o‘zini yakkalash” tartibi 6-apreldan majburiy joriy etiladi
15-aprel holatiga ko‘ra, karantin qoidalariga amal qilmaslik bo‘yicha 63 882 ta huquqbuzarlik aniqlangani aytildi: huquqbuzarliklarning 58 901 tasi erkaklar, 4981 tasi esa ayollar tomonidan sodir etilgan.
Huquqbuzarlarning 60 628 nafari tibbiy niqob taqmasdan yurish, 401 nafari karantin hududini tashlab ketish, 220 nafari vaqtinchalik to‘xtatilgan savdo faoliyatini davom ettirish, 29 nafari marosim yoki yig‘inlar o‘tkazish, 10 nafari ijtimoiy tarmoqlarda vahima chiqaruvchi yoki asossiz ma’lumotlar tarqatish va 2594 nafari boshqa huquqbuzarliklarni sodir etgani ta’kidlandi.
Karantin e’lon qilingan kundan boshlab 20 nafar fuqaro belgilangan tartibni qo‘pol ravishda buzganligi uchun jinoyat ishlari qo‘zg‘atilib, aksariyati qamoqqa olingan. Shu kungacha bemorlar bilan muloqotda bo‘lgan 9538 nafar shaxs haqida to‘plangan ma’lumotlar asosida ular bilan muloqotda bo‘lgan shaxslarning 2204 nafari bemorning yaqin qarindoshlari, 3877 nafari birga ishlovchi va doimiy muloqotda bo‘lgan shaxslar, 3453 nafari esa bir marotaba muloqotga kirishgan shaxslar ekanligi aniqlangan.
Avvalroq 1-apreldan boshlab Toshkent, Nukus shaharlari va viloyatlar markazlarida “o‘zini yakkalash” (“samoizolyatsiya”) hayot tarzi joriy etilgani, Toshkent, Nukus shaharlari va viloyatlar markazlarida 65 yoshdan yuqori bo‘lgan fuqarolarga uyidan tashqariga chiqish qat’iyan man etilgani haqida xabar berilgan edi.
Ma’lumot uchun, O‘zbekistonda karantinning qachon tugashi noma’lum — karantin davrini tugatish Respublika maxsus komissiyasi qaroriga ko‘ra amalga oshiriladi. Ayni vaqtda yolg‘iz keksalar va nogironligi bo‘lgan shaxslarga oziq-ovqat va dori-darmon karantin davri oxirigacha bepul yetkazib beriladi.
Izoh (0)