АОКА ҳузуридаги штабда 15 апрель куни Адлия вазирлиги ахборот хизмати раҳбари Севара Ўринбоева билан брифинг ўтказилди. Унда карантин ва «ўзини яккалаш» тушунчалари ва уларнинг фарқига тўхталиб ўтди.
Унинг таъкидлачига, «ўзини яккалаш» бу — карантинга оид чора-тадбирларнинг бир қисми. Карантинга олинган шахслар тиббиёт ёки санитария-эпидемиология ходимларининг доимий кузатуви ва назорати остида бўлади. «Ўзини яккалаш» ҳаёт тарзида эса фуқаро тиббий кузатув ёки назорат остида бўлмайди.
«Ўзини яккалаш» бўйича ўрнатилган карантин чекловларини бузиш эпидемияларга қарши кураш қоидаларини бузиш ҳисобланади ва бунинг учун фуқароларга 4 миллион 460 минг сўмдан 6 миллион 690 минг сўмгача, мансабдор шахсларга эса 6 миллион 690 минг сўмдан 11 миллион 150 минг сўмгача миқдорда жарима солишга сабаб бўлади.
Эслатиб ўтамиз, Ўзбекистоннинг йирик шаҳарларида «ўзини яккалаш» тартиби 6 апрелдан мажбурий жорий этилди. Унга кўра, шахснинг ўзининг яшаш ҳудудидаги савдо нуқталарида биринчи галдаги ҳаётий зарур бўлган эҳтиёжлари (озиқ-овқат, дори-дармон, тиббий буюм ва воситаларни харид қилиш ва бошқалар) учун ва шифокор кўригига мурожаат этишдан бошқа мақсадларда чиқиши қатъиян чекланди.
Ҳаракатланишда ҳамда савдо дўконлари ва бошқа жойларда 2 метрлик ижтимоий масофани сақлаш талаб этилади. 65 ёшдан юқори ёшда ва сурункали касаллиги бўлган фуқаролар ўз уйларидан ўта заруратсиз ташқарига чиқиши қатъиян ман этилди.
Ўзбекистонда карантиннинг қачон тугаши эса номаълум. У Республика махсус комиссияси қарорига кўра амалга оширилади. Айни вақтда ёлғиз кексалар ва ногиронлиги бўлган шахсларга озиқ-овқат ва дори-дармон карантин даври охиригача бепул етказиб берилади.
Изоҳ (0)