Xalqaro valyuta jamg‘armasi tomonidan e’lon qilingan koronavirus pandemiyasi sharoitida jahon iqtisodiyotining rivojlanishi prognoziga ko‘ra, 2020-yilda O‘zbekiston yalpi ichki mahsulotining o‘sishi 1,8 foizni tashkil qilishi mumkin.
Tahlilchilarning fikricha, jahon YaIMning 2020-yildagi o‘sishi 3 foizga pasayishi mumkin, bu ko‘rsatgich 2008—2009-yillarda bo‘lgan moliyaviy inqirozga nisbatan ancha yomon hisoblanadi.
XVJ O‘zbekiston YaIMning o‘sishi 2019-yildagi 5,6 foizdan 2020-yilda 1,8 foizga tushishini taxmin qilmoqda. Bundan tashqari, 2021-yilda mamlakatda iqtisodiy o‘sish tiklanib, 7 foizni tashkil qilishi mumkin.
Jamg‘armaning hisobotiga ko‘ra, Qozog‘iston YaIM 2,5 foizga (2019-yildagi prognoz 4,5 foiz), Qirg‘izistonda esa 4 foizga (2019-yildagi prognoz 4,5 foiz) pasayishi mumkin. Tojikiston iqtisodiyoti 2020-yilda 1 foizga (2019-yildagi prognoz 7,5 foiz), Turkmaniston iqtisodiyoti esa 1,8 foizga o‘sadi (2019-yildagi prognoz 6,3 foiz).
Avvalroq Xalqaro valyuta jamg‘armasi COVID-19 sabab dunyo iqtisodiyotining o‘ta og‘ir qulashini prognoz qilgani haqida xabar berilgan edi.
Eslatib o‘tamiz, Jahon banki 2020-yilda O‘zbekiston YaIMining o‘sish darajasi 1,6 foizga teng bo‘lishini prognoz qilgan. Osiyo taraqqiyot banki esa 2020-yilda O‘zbekistonda iqtisodiy o‘sish 4,7 foizni tashkil etishini taxmin qilgan.
Izoh (0)