Nyu-York shahri meri koronavirus bilan kasallanganlar soni kamayganini ma’lum qildi

Nyu-York meri Bill de Blazio shaharda koronavirus bilan kasallanganlar va kasalxonaga yotqizilganlar soni kamayganini ma’lum qildi. Bu haqda The New York Times xabar bergan.

Merning aytishicha, shanba kuni 383 nafar odam COVID-19 bilan kasallanib kasalxonaga yotqizilgan, juma kuni ushbu raqam 463 ni tashkil qilgan, intensiv davolash bo‘limlariga joylashtirilganlarning soni esa mos ravishda 857 ga 835 nisbatida bo‘lgan.

Shuningdek, de Blazioning so‘zlariga ko‘ra COVID-19’ga test qilingan odamlarda koronavirus aniqlanishining ko‘rsatkichi 59,2 foizdan 58,1 foizgacha pasaygan. Biroq shunga qaramay, ushbu kamayish vaziyatning yaxshilangani va karantin choralarini yengillashtirish lozimligini anglatmaydi, bunga hali erta. Nyu-Yorkda COVID-19 bilan kasallanganlarning umumiy soni 103,2 ming nafarga yetgan, 6,9 ming nafar kishi koronavirus keltirib chiqargan pnevmoniya oqibatida vafot etgan.

Nyu-York shtati bo‘yicha o‘lganlar soni 10 ming nafardan oshib ketgan, 12-aprel holatiga ko‘ra o‘lim ko‘rsatkichi muayyan darajada pasaygan, ya’ni bir kunda 671 nafar kishi vafot etdi. Nyu-York gubernatori Endryu Kuomo shtatda koronavirus tarqalishi nazoratga olingani va “eng yomoni” ortda qolganini ma’lum qilgan. Shuningdek, shtat aholini o‘ylamay qadam bosmaslikka chaqirib, bu COVID-19’dan vafot etadiganlar sonining o‘sishiga sabab bo‘lishi mumkinligi haqida ogohlantirgan.5-aprelda Nyu-Yorkda doimiy yashab, ishlab kelgan, oilalari ham shu yerda bo‘lgan ikki nafar o‘zbekistonlikning COVID-19’dan vafot etgani xabar qilingan, keyinchalik O‘zbekiston TIV ushbu ma’lumotni tasdiqlagandi. 7-aprelda yana bir o‘zbekistonlik koronavirusdan o‘lgani ma’lum qilindi. Keyinroq Nyu-Yorkdagi uchinchi qurbon mashhur shashmaqom ijrochisi Rustam Samarqandiy ekani oydinlashdi.