Нью-Йорк шаҳри мэри коронавирус билан касалланганлар сони камайганини маълум қилди

Нью-Йорк мэри Билл де Блазио шаҳарда коронавирус билан касалланганлар ва касалхонага ётқизилганлар сони камайганини маълум қилди. Бу ҳақда The New York Times хабар берган.

Мэрнинг айтишича, шанба куни 383 нафар одам COVID-19 билан касалланиб касалхонага ётқизилган, жума куни ушбу рақам 463 ни ташкил қилган, интенсив даволаш бўлимларига жойлаштирилганларнинг сони эса мос равишда 857 га 835 нисбатида бўлган.

Шунингдек, де Блазионинг сўзларига кўра COVID-19’га тест қилинган одамларда коронавирус аниқланишининг кўрсаткичи 59,2 фоиздан 58,1 фоизгача пасайган. Бироқ шунга қарамай, ушбу камайиш вазиятнинг яхшилангани ва карантин чораларини енгиллаштириш лозимлигини англатмайди, бунга ҳали эрта. Нью-Йоркда COVID-19 билан касалланганларнинг умумий сони 103,2 минг нафарга етган, 6,9 минг нафар киши коронавирус келтириб чиқарган пневмония оқибатида вафот этган.

Нью-Йорк штати бўйича ўлганлар сони 10 минг нафардан ошиб кетган, 12 апрель ҳолатига кўра ўлим кўрсаткичи муайян даражада пасайган, яъни бир кунда 671 нафар киши вафот этди. Нью-Йорк губернатори Эндрю Куомо штатда коронавирус тарқалиши назоратга олингани ва «энг ёмони» ортда қолганини маълум қилган. Шунингдек, штат аҳолини ўйламай қадам босмасликка чақириб, бу COVID-19’дан вафот этадиганлар сонининг ўсишига сабаб бўлиши мумкинлиги ҳақида огоҳлантирган.5 апрелда Нью-Йоркда доимий яшаб, ишлаб келган, оилалари ҳам шу ерда бўлган икки нафар ўзбекистонликнинг COVID-19’дан вафот этгани хабар қилинган, кейинчалик Ўзбекистон ТИВ ушбу маълумотни тасдиқлаганди. 7 апрелда яна бир ўзбекистонлик коронавирусдан ўлгани маълум қилинди. Кейинроқ Нью-Йоркдаги учинчи қурбон машҳур шашмақом ижрочиси Рустам Самарқандий экани ойдинлашди.