O‘zbekistonda dam olish kunlari qanday ob-havo kutilayotgani ma’lum qilindi

O‘zbekistonga 11-aprel, shanba kuni, Eron hududidan nam, lekin iliq havo kirishni boshlaydi, deb xabar bermoqda “O‘zgidromet”.

Qayd etilishicha, ayrim joylarga kuchsiz yomg‘ir yog‘ishi mumkin, faqat Qoraqalpog‘iston Respublikasi, Xorazm viloyati va Farg‘ona vodiysi viloyatlarida ob-havo yog‘ingarchiliksiz bo‘ladi. Havo harorati kechasi 5-8, kunduzi 17-22 darajagacha ko‘tariladi.

12-aprel, yakshanba kuni, respublikaning katta qismida yomg‘ir, ayrim joylarda kuchli yomg‘ir yog‘adi. Momaqaldiroq bo‘lishi mumkin. Qoraqalpog‘istonda, Xorazm va Surxondaryo viloyatlarining ayrim joylarida kuchsiz yomg‘ir yog‘adi, Farg‘ona vodiysida yog‘ingarchilik kutilmaydi. Shamol tezligi 15-20 metr/sekundgacha kuchayadi, shiddat bilan esganda 23-28 metr/sekundgacha yetadi.

Keyingi haftaning boshida O‘zbekistonda nobarqaror, ayrim joylarda shamolli ob-havo saqlanib turadi. Qoraqalpog‘iston Respublikasi va Xorazm, Navoiy, Buxoro viloyatlaridan tashqari boshqa hududlarda yomg‘ir, ba’zi joylarda jala yog‘adi. Kunduzgi harorat 3-5 darajaga pasayadi.

12—14-aprelda respublikaning tog‘oldi va tog‘li tumanlarida sel kelishi xavfi bor.