Ўзбекистонда дам олиш кунлари қандай об-ҳаво кутилаётгани маълум қилинди

Ўзбекистонга 11 апрель, шанба куни, Эрон ҳудудидан нам, лекин илиқ ҳаво киришни бошлайди, деб хабар бермоқда «Ўзгидромет».

Қайд этилишича, айрим жойларга кучсиз ёмғир ёғиши мумкин, фақат Қорақалпоғистон Республикаси, Хоразм вилояти ва Фарғона водийси вилоятларида об-ҳаво ёғингарчиликсиз бўлади. Ҳаво ҳарорати кечаси 5-8, кундузи 17-22 даражагача кўтарилади.

12 апрель, якшанба куни, республиканинг катта қисмида ёмғир, айрим жойларда кучли ёмғир ёғади. Момақалдироқ бўлиши мумкин. Қорақалпоғистонда, Хоразм ва Сурхондарё вилоятларининг айрим жойларида кучсиз ёмғир ёғади, Фарғона водийсида ёғингарчилик кутилмайди. Шамол тезлиги 15-20 метр/секундгача кучаяди, шиддат билан эсганда 23-28 метр/секундгача етади.

Кейинги ҳафтанинг бошида Ўзбекистонда нобарқарор, айрим жойларда шамолли об-ҳаво сақланиб туради. Қорақалпоғистон Республикаси ва Хоразм, Навоий, Бухоро вилоятларидан ташқари бошқа ҳудудларда ёмғир, баъзи жойларда жала ёғади. Кундузги ҳарорат 3-5 даражага пасаяди.

12—14 апрелда республиканинг тоғолди ва тоғли туманларида сел келиши хавфи бор.