2019-yil 31-mart kuni Huawei kompaniyasi yuqori darajadagi ish faolligi ko‘rsatkichlarini aks ettirgan 2019-yil uchun yillik hisobotini e’lon qildi. 2019-yilda kompaniyaning dunyo bo‘ylab sotuvlardan tushgan daromadi taxminan 123 milliard AQSh dollarini tashkil etdi, bu o‘tgan yil ko‘rsatkichlariga nisbatan 19,1 foizga ko‘p demakdir. Huawei kompaniyasining sof foydasi 9 milliard AQSh dollariga yetdi, operatsion faoliyatdan tushgan pul mablag‘lari hajmi esa 13,1 milliard dollardan oshdi va bu uning o‘tgan yilga nisbatan 22,4 foizga ko‘payganini ko‘rsatadi. Yangi texnologiyalar va tadqiqotlarga uzoq muddatli doimiy sarmoya kiritish doirasida Huawei kompaniyasi o‘zining 2019-yildagi daromadining 15,3 foizini yoki 18,86 milliard AQSh dollarini Ilmiy tadqiqot va tajriba konstruktorlik ishlanmalariga investitsiya qildi. Kompaniyaning so‘nggi o‘n yillikda Ilmiy tadqiqot va tajriba konstruktorlik ishlanmalariga qilgan umumiy xarajatlari 85,9 milliard AQSh dollaridan oshdi.
“2019-yil Huawei kompaniyasi uchun mislsiz murakkab yil bo‘ldi. Kuchli tashqi bosimga qaramay, bizning jamoamiz faqatgina mijozlarga ko‘proq foyda keltirishga intilib, ishonch bilan oldinga qarab harakat qildi. Biz ularning hurmati va ishonchini, shuningdek butun dunyodagi hamkorlarimizning hurmati va ishonchini qozonish uchun ko‘p ishladik. Bizning biznesimiz barqarorlikni saqlab qolishda davom etmoqda”,— dedi kompaniyaning amaldagi bosh direktori Erik Syuy.
2019-yilda Huawei Carrier biznes guruhi 5G tarmoqlarini tijoriy ishga tushirilishi bo‘yicha yetakchi o‘rinni egalladi. Tijorat maqsadlarida tatbiq etish imkoniyatlarini kengaytirish va 5G sohasidagi ilg‘or texnologiyalarni rivojlantirishni rag‘batlantirish maqsadida kompaniya o‘zining hamkorlari – aloqa operatorlari bilan birgalikda 5G yechimlarini ilgari surish uchun butun dunyo bo‘ylab innovatsion markazlarni yaratdi. Huawei kompaniyasining RuralStar bazaviy stansiyasi uchun mo‘ljallangan yechimi qishloq joylarda qamrab olish muammolarini samarali hal qilishga imkon beradi. Hozirgi kunda u taxminan 50 ta mamlakat va mintaqalarda qo‘llaniladi va chekka hududlardagi 40 milliondan ortiq aholini mobil Internet bilan ta’minlaydi. 2019-yilda Huawei Carrier biznes guruhi tomonidan olingan sotishdan tushgan daromadlar o‘tgan yilga nisbatan 3,8 foizga o‘sib, 42,5 milliard AQSh dollarini tashkil etdi.
Huawei Enterprise biznes guruhi o‘zining mutlaqo xilma-xil sohalardagi mijozlariga raqamli o‘zgartirishlarni amalga oshirish va raqamli dunyoga asos solish uchun yordam berishda davom etmoqda. Butun dunyo bo‘ylab 700 dan ortiq shahar va Fortune Global 500 ro‘yxatiga kiritilgan 228 ta kompaniya raqamli o‘zgartirishlar bo‘yicha hamkor sifatida Huawei’ni tanladi. 2019-yilda Huawei kompaniyasi kompyuter va hisoblash texnikasi sohasida o‘zining aqlli dunyoning kelgusida o‘sishi va gullab-yashnashi uchun unumdor zamin tayyorlashga qaratilgan yangi strategiyasini e’lon qildi. Ushbu strategiya doirasida kompaniya sun’iy intellektni o‘rgatishni tezlashtirishga mo‘ljallangan dunyodagi eng tezkor Ascend 910 SI-protsessor va Atlas 900 klasterini taqdim etdi. 2019-yilda Huawei kompaniyasining korporativ yechimlar sohasidagi sotishdan olgan daromadi 12,8 milliard AQSh dollariga yetdi, bu o‘tgan yil ko‘rsatkichlariga nisbatan 8,6 foizga ko‘p.
Huawei Consumer biznes guruhi avvalgidek barqaror o‘sib bormoqda; o‘tgan yili smartfonlarni yetkazib berish 240 million donani tashkil etdi. Kompaniya sun’iy intellektni qo‘llashning barcha mavjud variantlarini va turli xil qurilmalarni, shu jumladan shaxsiy kompyuterlar, planshetlar, taqib yuriladigan elektronika va aqlli displeylarni ishlab chiqishni o‘z ichiga olgan “Sun’iy intellekt hayotdagi barcha holatlarda” (Seamless AI Life) ekotizimini ishlab chiqish sohasida muvaffaqiyatli rivojlanishga erishganini ma’lum qildi. 2019-yilda Huawei Consumer biznes guruhining daromadi o‘tgan yilga nisbatan 34 foizga oshib, 66,9 milliard AQSh dollarini tashkil etdi.
“Kelajakda tashqi muhit yanada murakkablashib boradi. Biz ochiq innovatsiyalarni qo‘llab-quvvatlash va mijozlarimiz va umuman jamiyat uchun ko‘proq foyda keltirish bilan o‘zimizning mahsulotlarimiz va xizmatlarimizning raqobatbardoshligini yanada oshirishimiz kerak. Bu sanoat sohasining raqamli va intellektual o‘zgarishi bizga taqdim etadigan tarixiy imkoniyatlardan foydalanishning va uzoq muddatli istiqbolda barqaror o‘sishni qo‘llab-quvvatlashning yagona yo‘lidir”, — deb ogohlantiradi Erik Syuy.
2019-yil uchun yillik hisobotdagi barcha moliyaviy ko‘rsatkichlar KPMG – “Katta to‘rtlik” xalqaro audit kompaniyasi tomonidan tekshirildi. 2019-yil hisobotini quyidagi saytdan yuklab olish mumkin: www.huawei.com/en/press-events/annual-report/2019
AQSh dollari kursi 2019-yil 31-dekabr holati bo‘yicha olindi: 1.00 AQSh dollari = 6.9 yuan
Reklama huquqi asosida.
Izoh (0)