O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha respublika maxsus komissiyasining navbatdagi majlisi bo‘lib o‘tdi, deya xabar bermoqda Telegramdagi @koronavirusinfouz rasmiy kanali.
Xabar berishlaricha, O‘zbekistonda bemorlar yoki kasallikka shubha qilingan shaxslarni o‘z vaqtida aniqlash va mamlakat bo‘ylab kasallikning tarqalishini oldini olish maqsadida, shuningdek, majlisda ko‘rilgan boshqa masalalar yuzasidan maxsus komissiyasi yig‘ilishining qarori qabul qilingan.
Unga ko‘ra, 21-martdan e’tiboran barcha hududlarda faoliyat yuritayotgan mavjud ko‘ngilochar obyektlar, shu jumladan, tungi klublar, diskoteka, spa va massaj salonlari, choyxona, oshxona (uyga eltib berish xizmati bundan mustasno), karaoke, bilyard zallari, chilim (kalyan) markazlari va kompyuter o‘yinlari xizmatini ko‘rsatuvchi tadbirkorlik faoliyati turlari koronavirus kasalligi bilan bog‘liq epidemiologik holat barqarorlashgunga qadar to‘xtatiladi.
Shuningdek, 23-martdan boshlab “Aholining sanitariya-epidemiologik osoyishtaligi to‘g‘risida”gi qonunga muvofiq, O‘zbekiston fuqarolarining sog‘lig‘ini himoya qilish maqsadida to‘y-hashamlar, oilaviy tantanalar, ma’raka va marosim singari ommaviy tadbirlar o‘tkazilishi bekor qilinadi. Ushbu marosimlarni zarur bo‘lgan taqdirdagina, ixcham holda, yaqinlar bilan birga 10-15 kishi ishtirokida o‘tkazish tavsiya etiladi.
“Majlisda ayni paytda chet ellarda bo‘lib turgan fuqarolarni mamlakatimizga qisqa vaqtlar ichida olib kelish va ularni belgilangan tartibda 14 kun karantinda saqlash yuzasidan ko‘rilayotgan choralar atroflicha muhokama qilindi”, — deyiladi e’lon qilingan axborotda.
Ma’lumot uchun, O‘zbekistonda koronavirusga chalingan fuqarolar soni 20-mart kuni 33 nafarga yetgani ma’lum bo‘ldi. Ta’kidlanishicha, kasallangan shaxslarning 90 foizi koronavirus aniqlangan o‘zbekistonlik birinchi va ikkinchi bemorlar bilan muloqotda bo‘lganlardir.
Izoh (0)