O‘zbekiston hukumati 19-mart, payshanba kuni, Xorazm viloyatida Al-Xorazmiy nomidagi Xalqaro fizika va matematika maktab-internatini tashkil etish to‘g‘risidagi qarorni qabul qildi, deya xabar bermoqda Adliya vazirligi.
Qarorga muvofiq, Shovot tumanidagi 1-son ixtisoslashtirilgan davlat maktab-internati negizida Al-Xorazmiy nomidagi Xalqaro fizika va matematika maktab-internati tashkil etildi.
Xalqaro maktab umumiy o‘rta ta’limning davlat ta’lim standartlari asosida zamonaviy axborot texnologiyalaridan keng foydalangan holda aniq va tabiiy fanlar, shuningdek, chet tillari chuqur o‘qitilishini tashkil etadi.
2020/2021-o‘quv yilidan boshlab xalqaro maktabning 7-sinfiga 60 nafar o‘quvchi qabul qilinadi. Unda chet ellik iqtidorli o‘quvchilar shartnoma asosida ta’lim olishi mumkin, shuningdek, xorijiy mamlakatlarning o‘quv dasturlari ham tatbiq etilishi mumkin.
Bundan tashqari, maktabga xorijiy mamlakatlardan o‘qituvchilarni ishga qabul qilishga ham ruxsat beriladi. Maktab uchun 20 o‘rinli turar joy binosi qurilishi ko‘zda tutilgan.
Izoh (0)