“Agrar va oziq-ovqat sohalarini boshqarish tizimini yanada takomillashtirish chora-tadbirlari to‘g‘risida”gi Prezident qarori qabul qilindi. Bu haqda “Huquqiy axborot” Telegram kanali xabar qilgan.
Qaror bilan, bosh vazirning agrar va oziq-ovqat sohalarini rivojlantirish masalalari bo‘yicha o‘rinbosarining asosiy vazifalari belgilandi.
Bosh vazir o‘rinbosari, jumladan, qishloq xo‘jaligini rivojlantirishning 2020—2030-yillarga mo‘ljallangan strategiyasida belgilangan islohotlarni samarali amalga oshirishni ta’minlaydi.
Qarorda Bosh prokuratura tuzilmasida qishloq xo‘jaligi va oziq-ovqat xavfsizligi sohasida qonun hujjatlari talablariga rioya etilishi va ularning ijrosi ustidan nazoratni amalga oshirishga mas’ul etib belgilangan yangi:
- bosh prokuror o‘rinbosari;
- Qoraqalpog‘iston Respublikasi va viloyatlar prokurorlarining o‘rinbosarlari;
- transport prokurorining katta yordamchisi lavozimlari kiritildi.
Bosh prokuraturaning Qishloq xo‘jaligi sohasida qonunchilik ijrosi ustidan nazorat boshqarmasi Agrar va oziq-ovqat sohalarini rivojlantirishga oid qonunchilik ijrosi ustidan nazorat boshqarmasi deb qayta nomlandi.
Qaror bilan, Ichki ishlar vazirligi Moliya va moddiy-texnika ta’minoti bosh boshqarmasi vazirlik Moliya va moddiy-texnika ta’minoti departamenti etib qayta tashkil etildi.
Hujjatga ko‘ra, tuman va shahar hokimlari o‘z hududidagi qishloq xo‘jaligi ekin maydonlarida haqiqiy ahvolni o‘rganish uchun “Davyergeodezkadastr” yoki uning hududiy boshqarmalariga uchuvchisiz uchish apparatlaridan (dronlardan) foydalanish bo‘yicha buyurtma berish vakolatiga ega bo‘ldi.
Mavzuga doir:
- Yevropa Ittifoqi O‘zbekiston qishloq xo‘jaligini rivojlantirishga 40 mln yevro ajratdi
- O‘zbekistonda o‘zboshimchalik bilan egallangan yerlarni aniqlashda Google Maps’dan foydalanilayotgani qonuniymi?
- O‘zbekistonda paxtaga davlat buyurtmasi bekor qilindi
- O‘zbekistonda limon yetishtirish uchun subsidiyalar ajratiladi, 100 mln dollar investitsiya jalb qilinadi
Izoh (0)