Oliy Majlis Qonunchilik palatasida 10-mart kuni navbatdagi “Hukumat soati” o‘tkazildi. “Kun.uz”ning yozishicha, unda deputat Rasul Kusherbayev sud jarayonlarida fuqarolar tomonidan o‘zboshimchalik bilan egallab olinganini isbotlashda O‘zbekistonda rasmiy axborot manbasi sifatida ro‘yxatdan o‘tmagan Google Maps ma’lumotlaridan asosiy dalil sifatida foydalanilayotganini ta’kidlab, bu qanchalik qonuniyligi, qo‘mita va Google korporatsiyasi o‘rtasida bu borada kelishuv shartnomasi bor-yo‘qligi bilan qiziqdi.

Uning savoliga Yer resurslari, geodeziya, kartografiya va davlat kadastri davlat qo‘mitasi raisi Abdushukur Abdullayev javob berdi.

“Google Maps ma’lumotlari bizda rasmiy axborot manbasi sifatida ro‘yxatdan o‘tmagan. Lekin ular bilan birga ishlab kelyapmiz. Bizda milliy geografik axborot tizimi shakllantirilgan. O‘sha bo‘yicha yerlarning 21 ta qavati bor. Rejamizga ko‘ra, aynan Google korporatsiyasi bilan birgalikda bizdagi resursdan foydalaniladigan qilmoqchimiz. Biroq bunda bitta xalal beradigan omil bor edi. Birinchidan ularni ro‘yxatga olish, ikkinchidan, ularga beriladigan ma’lumotlarning hammasi ochiq bo‘lishi kerak edi.

2020-yilning 12-yanvar kuni Vazirlar Mahkamasining yangi qarori qabul qilindi, unga ko‘ra, bizga imkon yaratildi. Google’dan olinayotgan ma’lumotlar qo‘shimcha ma’lumot sifatida ishlatiladi. Chunki O‘zbekiston yerlarning holati koinotdan turib tasvirga olinmagan. Biz koinotdan olingan oxirgi tasvirlarni uch yil oldin oldik. Yerlarning o‘zboshimchalik bilan egallab olinganini aniqlashda qishloq xo‘jaligi xaritalari, navbatchi xaritalar va bazamizdagi ma’lumotlardan foydalanamiz”, — deb javob bergan Abdushukur Abdullayev.