AQSh kasalliklarning oldini olish va nazorat qilish markazi tashkilotchilarni 50 va undan ortiq kishi ishtirok etuvchi barcha ommaviy tadbirlarni kechiktirish yoki bekor qilishga chaqirdi, deb yozadi “RBK”.
Markaz ekspertlari ommaviy tadbirlarga keluvchi xorijiy fuqarolar AQShda koronavirus infeksiyasining tarqalishiga sabab bo‘lishi mumkinligini aytgan.
Masalan, konferensiyalar, festivallar, paradlar, konsertlar, sport tadbirlari, to‘ylar shular jumlasidandir.
Bunday tadbirlarni sakkiz haftagacha o‘tkazmaslik tavsiya qilinmoqda.
Shifokorlar iloji bo‘lsa, tadbirlarning formatini virtual shakliga o‘zgartirishni taklif qildi va agar ular o‘tkazilgan taqdirda gigiyena talablariga amal qilishni so‘radi.
Markaz ekspertlari bu taklif maktablar, universitetlar yoki korxonalarning kundalik faoliyatiga taalluqli emasligini ta’kidladi.
Eslatib o‘tamiz, AQShda yangi turdagi COVID-19 koronavirusining tarqalishi sabab Yevropa mamlakatlaridan keluvchilar uchun 30 kunga vaqtinchalik taqiq o‘rnatildi. Birozdan so‘ng Donald Tramp mamlakatda COVID-19 koronavirus infeksiyasi tarqalishi oqibatida favqulodda holat rejimi e’lon qilinganini bildirdi. Uning o‘zi ham koronavirusga test topshirdi. Trampda kasallik aniqlanmadi.
Ma’lumot uchun, ayni paytda O‘zbekistonda koronavirusga chalingan bemorlar soni olti nafarga yetdi.
15-mart, yakshanba kuni, Fransiyada bo‘lib qaytgan o‘zbekistonlik ayolda COVID-19 koronavirus infeksiyasi aniqlangani haqida xabar berilgandi. Shundan so‘ng, ayol bilan muloqotda bo‘lgan barcha oila a’zolari Respublika Virusologiya ilmiy tekshirish instituti klinikasi yotqizilgandi. Undan tashqari, shu reysda kelib, O‘zbekistonda qolgan yo‘lovchilarning bari aniqlanib, umumiy hisobda 150 kishi izolyatsiyaga olingani haqida xabar berilgandi.
16-martdan O‘zbekistonda barcha maktablar, bog‘chalar va OTMlar karantinga yopildi, Uzbekistan Airways mahalliy va xalqaro aviaqatnovlarni bekor qildi.
Izoh (0)