АҚШ касалликларнинг олдини олиш ва назорат қилиш маркази ташкилотчиларни 50 ва ундан ортиқ киши иштирок этувчи барча оммавий тадбирларни кечиктириш ёки бекор қилишга чақирди, деб ёзади «РБК».
Марказ экспертлари оммавий тадбирларга келувчи хорижий фуқаролар АҚШда коронавирус инфекциясининг тарқалишига сабаб бўлиши мумкинлигини айтган.
Масалан, конференциялар, фестиваллар, парадлар, концертлар, спорт тадбирлари, тўйлар шулар жумласидандир.
Бундай тадбирларни саккиз ҳафтагача ўтказмаслик тавсия қилинмоқда.
Шифокорлар иложи бўлса, тадбирларнинг форматини виртуал шаклига ўзгартиришни таклиф қилди ва агар улар ўтказилган тақдирда гигиена талабларига амал қилишни сўради.
Марказ экспертлари бу таклиф мактаблар, университетлар ёки корхоналарнинг кундалик фаолиятига тааллуқли эмаслигини таъкидлади.
Эслатиб ўтамиз, АҚШда янги турдаги COVID-19 коронавирусининг тарқалиши сабаб Европа мамлакатларидан келувчилар учун 30 кунга вақтинчалик тақиқ ўрнатилди. Бироздан сўнг Дональд Трамп мамлакатда COVID-19 коронавирус инфекцияси тарқалиши оқибатида фавқулодда ҳолат режими эълон қилинганини билдирди. Унинг ўзи ҳам коронавирусга тест топширди. Трампда касаллик аниқланмади.
Маълумот учун, айни пайтда Ўзбекистонда коронавирусга чалинган беморлар сони олти нафарга етди.
15 март, якшанба куни, Францияда бўлиб қайтган ўзбекистонлик аёлда COVID-19 коронавирус инфекцияси аниқлангани ҳақида хабар берилганди. Шундан сўнг, аёл билан мулоқотда бўлган барча оила аъзолари Республика Вирусология илмий текшириш институти клиникаси ётқизилганди. Ундан ташқари, шу рейсда келиб, Ўзбекистонда қолган йўловчиларнинг бари аниқланиб, умумий ҳисобда 150 киши изоляцияга олингани ҳақида хабар берилганди.
16 мартдан Ўзбекистонда барча мактаблар, боғчалар ва ОТМлар карантинга ёпилди, Uzbekistan Airways маҳаллий ва халқаро авиақатновларни бекор қилди.
Изоҳ (0)