Qozog‘istonda koronavirus tufayli nonni faqat qadoqlarda sotish tavsiya etildi

Qozog‘iston Savdo va integratsiya vazirligi mamlakatda COVID-19 koronavirus pandemiyasi tufayli favqulodda holat joriy etilganidan keyin bir qator tavsiyalar bilan chiqdi, deb xabar bermoqda Tengrinews.

Xususan, sanitariya yirik savdo obyektlari faoliyatini xavfsizligi choralarini kuchaytirgan holda 10 soatdan 18 soatgacha cheklashni tavsiya qildi. Savdo obyektlari hududida kinoteatrlar, bolalar markazlari va boshqa turli ko‘ngilochar joylar yopiq bo‘lishi kerak. Oziq-ovqat do‘konlari, supermarketlar va bozorlar sanitariya va dezinfeksiya tadbirlarini kuchaytirgan holda odatdagidek tartibda ishlashi kerak.

Shuningdek, non va qandolat mahsulotlarini sotish faqat qadoqlangan shaklda amalga oshirilishi kerak.

Eslatib o‘tamiz, Qozog‘istonda koronavirus tarqalishi munosabati bilan 16-martdan 15-aprelga qadar favqulodda holat rejimi joriy qilindi. Bu davrda qozog‘istonliklar mamlakatni tark eta olmaydi (xorijga davolanish uchun ketayotganlardan tashqari).

Hozirda Qozog‘istonda koronavirus yuqtirib olganlar soni olti nafarni tashkil etadi. 1090 kishi kasalxonaga yotqizilgan, 452 kishi uy karantinida.

Mamlakatda ommaviy tadbirlar bekor qilindi, maktab o‘quvchilari ta’tilga ertaroq chiqdi, davlat organlariga xorijga xizmat safariga chiqish taqiqlandi. Fuqarolarga qo‘l berib ko‘rishmaslik tavsiya qilindi.

Chimkentliklar halokatli koronavirusning oldini olish uchun xalq tabobati usullariga murojaat qilib, isiriq sotib olishni boshladi. Ayrim bozorlarda isiriqning hammasi sotilib ketgan.

Avvalroq O‘zbekistonda koronavirusga chalinish bilan bog‘liq birinchi holat qayd etilgani, 11-mart, chorshanba kuni, Uzbekistan Airways’ning Parij—Toshkent reysi bilan uchib kelgan ayol Respublika Virusologiya institutiga murojaat qilgani va tahlil natijalari uning koronavirusga chalingani xabar berilgandi.

Shundan so‘ng uning 9 nafar oila a’zosi, shuningdek, reysning O‘zbekistonda qolgan yo‘lovchilari va ular bilan muloqotda bo‘lgan odamlar — jami 150 kishi izolyatsiyaga olingani olingan. 16-martdan boshlab xorijiy davlatlar bilan barcha aviareyslar bekor qilinib, avtotransport vositasida O‘zbekistonga kirish-chiqish to‘xtatildi.