Kanada bosh vazirining turmush o‘rtog‘i Sofi Greguar-Tryudoda yangi turdagi COVID-19 koronavirus infeksiyasi aniqlandi. Bu haqda bosh vazir kanselyariyasining rasmiy bayonotiga tayanib, Global News xabar berdi.
“Shifokorlar tavsiyasidan so‘ng Sofi Greguar-Tryudo COVID-19 koronavirus uchun test topshirdi. Natijalar ijobiy chiqdi”, — deyiladi xabarda.
Ta’kidlanishicha, Kanada bosh vazirining rafiqasi o‘zini yaxshi his qilmoqda. Bosh vazir Jastin Tryudoning ham ahvoli yaxshi, unda koronavirus alomatlari aniqlanmagan. U rafiqasi bilan 14 kun davomida karantinda bo‘ladi.
“Uyda karantinda bo‘lish — buni boshidan o‘tkazayotgan boshqa kanadalik oilalar va sog‘liq borasida bundan-da jiddiy muammolarga duch kelganlar bilan taqqoslaganda arzimas narsa. Biz ushbu vaziyatdan birgalikda chiqamiz”, — deydi Sofi Tryudo.
Avvalroq Kanada bosh vaziri rafiqasi bilan koronavirusga tekshirilganidan keyin uydan turib ishlashga o‘tgani haqida xabar berilgan edi.
Kanada Sog‘liqni saqlash agentligining ma’lumotlariga ko‘ra, 12-mart holati bo‘yicha mamlakatda 138 kishida koronavirus aniqlangan. Ularning aksariyati Ontario va Britaniya Kolumbiyasi provinsiyalarida istiqomat qiladi.
Mavzuga doir:
Izoh (0)