Iordaniyaning Amman shahrida Tokio—2020 Olimpiadasiga litsenziya beradigan musobaqaning navbatdagi janglari 10-mart, seshanba kuni o‘tkazilmoqda.
Kunduzgi bahslarda yana uch nafar o‘zbekistonlik bokschi yarim final jangini o‘tkazdi. -63 kilogramm vazn toifasida ringga ko‘tarilgan Elnur Abduraimov mo‘g‘ulistonlik Chinzorig Baatarsuhga qarshi bahs olib bordi. Unda Elnur 3:2 hisobida g‘alabani qo‘lga kiritdi va finalda qozog‘istonlik Safiullinga qarshi jang qiladi.
-69 kilogramm vazn toifasidagi o‘zbekistonlik bokschi Bobousmon Boturov mezbonlar vakili Husseyn Iashashga qarshi jang olib bordi. Teng kurashlar ostida o‘tgan jangning ikkinchi raundida Boturov nokdaun holatiga tushib qoldi, bu esa bahs masalasini hal qildi. Bobousmon 2:3 hisobida mag‘lub bo‘lgan holda musobaqadagi yurishini to‘xtatdi.
-91 kilogramm vaznda O‘zbekiston terma jamoasi sharafasini himoya qilgan Sanjar Tursunov Yangi Zellandiya vakili David Nika bilan bahs yuritdi. Birinchi raundni o‘z foydasiga hal qilgan Sanjar qolgan ikkisida imkoniyatni boy berdi va 0:5 hisobida yutqazgan holda musobaqa bilan xayrlashdi.
Eslatib o‘tamiz, mazkur bokschilar Tokio Olimpiadasi yo‘llanmasiga ega chiqib bo‘lgan.
Musobaqaning kechki dasturida Mirazizbek Mirzahalilov (-57) va Bahodir Jalolov (+91) final yo‘llanmasi uchun o‘z janglarini o‘tkazadi.
Izoh (0)