Иорданиянинг Амман шаҳрида Токио—2020 Олимпиадасига лицензия берадиган мусобақанинг навбатдаги жанглари 10 март, сешанба куни ўтказилмоқда.
Кундузги баҳсларда яна уч нафар ўзбекистонлик боксчи ярим финал жангини ўтказди. -63 килограмм вазн тоифасида рингга кўтарилган Элнур Абдураимов мўғулистонлик Чинзориг Баатарсуҳга қарши баҳс олиб борди. Унда Элнур 3:2 ҳисобида ғалабани қўлга киритди ва финалда қозоғистонлик Сафиуллинга қарши жанг қилади.
-69 килограмм вазн тоифасидаги ўзбекистонлик боксчи Бобоусмон Ботуров мезбонлар вакили Ҳуссейн Иашашга қарши жанг олиб борди. Тенг курашлар остида ўтган жангнинг иккинчи раундида Ботуров нокдаун ҳолатига тушиб қолди, бу эса баҳс масаласини ҳал қилди. Бобоусмон 2:3 ҳисобида мағлуб бўлган ҳолда мусобақадаги юришини тўхтатди.
-91 килограмм вазнда Ўзбекистон терма жамоаси шарафасини ҳимоя қилган Санжар Турсунов Янги Зелландия вакили Давид Ника билан баҳс юритди. Биринчи раундни ўз фойдасига ҳал қилган Санжар қолган иккисида имкониятни бой берди ва 0:5 ҳисобида ютқазган ҳолда мусобақа билан хайрлашди.
Эслатиб ўтамиз, мазкур боксчилар Токио Олимпиадаси йўлланмасига эга чиқиб бўлган.
Мусобақанинг кечки дастурида Миразизбек Мирзаҳалилов (-57) ва Баҳодир Жалолов (+91) финал йўлланмаси учун ўз жангларини ўтказади.
Изоҳ (0)