Toshkent viloyati Quyi Chirchiq tumanida 9-mart, dushanba kuni Prezident Shavkat Mirziyoyev tomonidan ilgari surilgan beshta muhim tashabbus doirasida bolalar va o‘smirlar sport maktabi kapital ta’mirdan chiqarilib, foydalanishga topshirildi.
Loyiha qiymati 4 milliard 835 million so‘mga teng bo‘ldi (shundan 3 milliard 492 million so‘m davlat budjeti, 1 milliard 343 million so‘m mahalliy budjet). Mazkur obyekt futbol stadioni, ochiq tipdagi basketbol va voleybol maydonchalari, yugurish yo‘lakchasi hamda 12x24 o‘lchamdagi sport zalni o‘z ichiga oldi.
Endilikda ushbu bolalar va o‘smirlar sport maktabida 12 ta sport turi bo‘yicha to‘garaklar tashkil etilib, ularga qariyb ming nafarga yaqin mahalliy yoshlarni qamrab olish imkoniyati yaratildi.
Tabiiy maysali futbol maydonining o‘lchamlari Professional futbol ligasi tomonidan o‘tkazib kelinayotgan Pro-liga musobaqalarini qabul qilish imkonini beradi. “B” Pro-liga ishtirokchisi “Rubin” jamoasi o‘z uy uchrashuvlarini shu stadionda o‘tkazish istagini bildirmoqda.
Quyi Chirchiq tumani BO‘SMning mazkur filiali 1974 yilda qurilgan bo‘lib, o‘z vaqtida bu yerda futbol bo‘yicha xalqaro musobaqalar tashkil etilgan. Ammo, keyinchalik ushbu stadion va sport zal qarovsiz ahvolga kelib qolgandi. Kapital ta’mirdan keyin majmua zamonaviy ko‘rinish oldi.
Quyi Chirchiq tumani bolalar va o‘smirlar sport maktabining ochilish marosimida Jismoniy tarbiya va sport vaziri Dilmurod Nabiyev, Quyi Chirchiq tumani hokimi Akmal Xolmurodov hamda sport jamoatchiligi ishtirok etdi.
Izoh (0)