Shahrisabz tuman prokuraturasi maktab direktorlarini chaqirib, direktorlikka o‘tish uchun pora bergan yoki bermagani bilan qiziqmoqda. Tumandagi maktab direktorlari esa prokuratura xodimlari ularni maqsadsiz 4—5 soatlab ushlab turishidan shikoyat qilyapti.
Bu haqda “Daryo” muxbiri bilan suhbatlashgan 23-maktab direktori Barno Jo‘rayevaning ma’lumot berishicha, uni O‘ral ismli prokuratura xodimi ish payti soat 16:00 da chaqirtirgan va kechki payt 20:30 ga qadar ushlab turgan.
“Kechasi soat 20:30 ga qadar sovuqda prokuraturada qolib ketdik, kechki payt turmush o‘rtog‘im kelib olib ketdi. Uyga borgach, rosa gap eshitdim”, — deydi Barno Jo‘rayeva.
Barno Jo‘rayevaning ta’kidlashicha, prokuratura uni joriy yil 21-fevral, juma kuni ikkinchi marotaba chaqirgan. Direktor birinchi marotaba qurilish tashkilotining bajargan ishini so‘rash uchun chaqirilgan.
“2018-yil men rahbarlik qilayotgan maktabda joriy ta’mirlash ishlari qilinib, eshik va deraza romlari almashtirilgandi. Ana shu qurilish ishlari yakuniga yetganmi deb chaqirtirishgan ekan. Kamchiligi bormi, deb so‘rashdi. Qilingan ishlarni aytdim”, — deydi Barno Jo‘rayeva.
Mazkur ta’lim maskanida joriy ta’mir ishlarini olib borgan quruvchi Bahodir Chorshanbiyev ham audit tekshiruvi paytida tekshiruvchilar mazkur maktabdagi deraza oynalari almashmagan degan xulosada ketishgani bois uni ham prokuratura chaqirganini aytmoqda.
“43-maktabga qo‘yilgan 4 ta ‘kotyol’ning 2 tasi qo‘lbola degan ayb qo‘yishdi. Prokuraturaga barcha hujjatlarni ko‘rsatib, sotib olingan ‘kotyol’lar talabga javob berishini isbotlab berdim. Hatto yaqinda o‘tkazilgan taftish tekshiruvida ham bajargan ishlarimni tekshirib, to‘g‘ri bajarilgan degan xulosa berishdi. Shundan so‘ng, prokuratura ‘kotyol’ga sarflangan pulni to‘lab berishim kerakligi haqidagi talabidan voz kechib, endi 23-maktabga qo‘yilgan deraza oynalarini to‘lab berishimni aytmoqda”, — deydi Bahodir Chorshanbiyev.
Ma’lum qilinishicha, Shahrisabz tuman prokuraturasi joriy yil 21-fevral kuni 22 nafar maktab direktorini yana chaqirgan. Ammo nima maqsadda chaqirilgani maktab direktorlariga ayon emas.
“Nima uchun chaqirishganini bilmayman, ‘kelsin’ deyishgan ekan bordik. Ammo biroz o‘tgach, qaytib chiqdik”, — deydi maktab direktorlaridan biri Oybek Abdunazarov.
“Nega chaqirishganini bilmadim, faqat borgan paytim ‘qachon maktab direktori bo‘lgansiz, direktorlikka o‘tish uchun qancha pul bergansiz’ deb so‘rashdi. Pul bermaganimni aytdim. Meni birinchi marotaba chaqirishlari emas. O‘tgan safar ham chaqirishgandi va kechasi qo‘yib yuborishdi. Kechgacha ushlab turishgani uchun eshikdan chiqayotgan paytim qayd daftariga nechchida chiqib ketayotganimni, kechgacha ushlab turishganini yozdim”, — deydi 35-maktab direktori Go‘zal Aralova.
Aytilishicha, faqatgina 2018—2019-yilda maktab direktori lavozimiga qo‘yilgan maktab direktorlari chaqirilib, ‘maktab direktori bo‘lish uchun qancha pul bergansiz’, degan so‘roqqa tutilgan.
Qayd etish lozim, maktab direktorlarini lavozimiga tayinlash va ishdan bo‘shatish viloyat xalq ta’limi boshqarmasi boshlig‘i vakolatiga kiradi. 2018—2019-yillarda viloyatda boshqarma boshlig‘i lavozimida ayni paytda viloyat hokimligida kotibiyat mudiri sifatida faoliyat ko'rsatib kelayotgan Laziz Xolov faoliyat yuritgan. U 2019-yil fevral oyida lavozimidan ketgandi.
“Daryo” muxbiri bilan suhbatlashgan tuman prokuratura mas’ullari maktab direktorlari nima sababdan chaqirilayotgani-yu, kechgacha olib qolingani haqida viloyat prokuraturasi axborot xizmati orqali ma’lumot berilishini aytishdi. Ammo ikki hafta o‘tgan bo‘lsa-da bu haqda ma’lum qilishmadi.
Izoh (0)