Шаҳрисабз прокуратураси мактаб директорларини чақириб, директорликка ўтиш учун пора берган-бермагани билан қизиқмоқда

Шаҳрисабз туман прокуратураси мактаб директорларини чақириб, директорликка ўтиш учун пора берган ёки бермагани билан қизиқмоқда. Тумандаги мактаб директорлари эса прокуратура ходимлари уларни мақсадсиз 4—5 соатлаб ушлаб туришидан шикоят қиляпти.

Бу ҳақда «Дарё» мухбири билан суҳбатлашган 23-мактаб директори Барно Жўраеванинг маълумот беришича, уни Ўрал исмли прокуратура ходими иш пайти соат 16:00 да чақиртирган ва кечки пайт 20:30 га қадар ушлаб турган.

«Кечаси соат 20:30 га қадар совуқда прокуратурада қолиб кетдик, кечки пайт турмуш ўртоғим келиб олиб кетди. Уйга боргач, роса гап эшитдим», — дейди Барно Жўраева.

Барно Жўраеванинг таъкидлашича, прокуратура уни жорий йил 21 февраль, жума куни иккинчи маротаба чақирган. Директор биринчи маротаба қурилиш ташкилотининг бажарган ишини сўраш учун чақирилган.

«2018 йил мен раҳбарлик қилаётган мактабда жорий таъмирлаш ишлари қилиниб, эшик ва дераза ромлари алмаштирилганди. Ана шу қурилиш ишлари якунига етганми деб чақиртиришган экан. Камчилиги борми, деб сўрашди. Қилинган ишларни айтдим», — дейди Барно Жўраева.

Мазкур таълим масканида жорий таъмир ишларини олиб борган қурувчи Баҳодир Чоршанбиев ҳам аудит текшируви пайтида текширувчилар мазкур мактабдаги дераза ойналари алмашмаган деган хулосада кетишгани боис уни ҳам прокуратура чақирганини айтмоқда.

«43-мактабга қўйилган 4 та ‘котёлънинг 2 таси қўлбола деган айб қўйишди. Прокуратурага барча ҳужжатларни кўрсатиб, сотиб олинган ‘котёлълар талабга жавоб беришини исботлаб бердим. Ҳатто яқинда ўтказилган тафтиш текширувида ҳам бажарган ишларимни текшириб, тўғри бажарилган деган хулоса беришди. Шундан сўнг, прокуратура ‘котёлъга сарфланган пулни тўлаб беришим кераклиги ҳақидаги талабидан воз кечиб, энди 23-мактабга қўйилган дераза ойналарини тўлаб беришимни айтмоқда», — дейди Баҳодир Чоршанбиев.

Маълум қилинишича, Шаҳрисабз туман прокуратураси жорий йил 21 февраль куни 22 нафар мактаб директорини яна чақирган. Аммо нима мақсадда чақирилгани мактаб директорларига аён эмас.

«Нима учун чақиришганини билмайман, ‘келсин’ дейишган экан бордик. Аммо бироз ўтгач, қайтиб чиқдик», — дейди мактаб директорларидан бири Ойбек Абдуназаров.

«Нега чақиришганини билмадим, фақат борган пайтим ‘қачон мактаб директори бўлгансиз, директорликка ўтиш учун қанча пул бергансиз’ деб сўрашди. Пул бермаганимни айтдим. Мени биринчи маротаба чақиришлари эмас. Ўтган сафар ҳам чақиришганди ва кечаси қўйиб юборишди. Кечгача ушлаб туришгани учун эшикдан чиқаётган пайтим қайд дафтарига неччида чиқиб кетаётганимни, кечгача ушлаб туришганини ёздим», — дейди 35-мактаб директори Гўзал Аралова.

Айтилишича, фақатгина 2018—2019 йилда мактаб директори лавозимига қўйилган мактаб директорлари чақирилиб, ‘мактаб директори бўлиш учун қанча пул бергансиз’, деган сўроққа тутилган.

Қайд этиш лозим, мактаб директорларини лавозимига тайинлаш ва ишдан бўшатиш вилоят халқ таълими бошқармаси бошлиғи ваколатига киради. 2018—2019 йилларда вилоятда бошқарма бошлиғи лавозимида айни пайтда вилоят ҳокимлигида котибият мудири сифатида фаолият кўрсатиб келаётган Лазиз Холов фаолият юритган. У 2019 йил февраль ойида лавозимидан кетганди.

«Дарё» мухбири билан суҳбатлашган туман прокуратура масъуллари мактаб директорлари нима сабабдан чақирилаётгани-ю, кечгача олиб қолингани ҳақида вилоят прокуратураси ахборот хизмати орқали маълумот берилишини айтишди. Аммо икки ҳафта ўтган бўлса-да бу ҳақда маълум қилишмади.