Go‘shtni uzluksiz yetkazib berish, oziq-ovqat bazasi va sanoatini rivojlantirish ma’lum vaqt talab qiladi. Bu haqda Markaziy bankka tayanib, Spot xabar berdi.
Regulyator go‘sht va go‘sht mahsulotlariga bo‘lgan talabning sezilarli o‘sishiga nisbatan taklif hajmining noadekvat o‘sishini payqadi. Bu esa narxlarga ma’lum ma’noda bosim bo‘ladi.
“Belarus, Ukraina, Qozog‘iston, Qirg‘iziston kabi davlatlardan go‘shtning yetarli darajada import qilinmasligi, shuningdek, import qilinayotgan go‘sht narxining oshishi yaqin vaqtlar ichida narxlarga ta’sir qilishi mumkin”, — deyiladi xabarda.
2019-yili O‘zbekistonda go‘sht narxi eng ko‘p qimmatlashgan mahsulotlardan biriga aylandi — 23,4 foiz. Buning asosiy sabablari — chorva uchun ozuqa narxining yuqoriligi, ishlab chiqarish bazasining rivojlanmaganligi, chorvachilikni rivojlantirish dasturlari doirasida chorva mollariga talabning oshishi va restoran biznesida ovqatlanish sohasining sezilarli darajada kengayishi.
Markaziy bank qo‘shni davlatlardan tirik chorva mollarining importi oshgani go‘sht narxining sezilarli darajada qimmatlashini ushlab qolganini ta’kidlagan. Eslatib o‘tamiz, 2019-yil iyun oyida Qozog‘iston mamlakatdan yirik qoramol olib ketilishini taqiqlashga qaror qilgandi. Bunga ularning O‘zbekistonga katta miqdorda yetkazilgani sabab bo‘lgan. Avgust oyiga kelib Qozog‘iston O‘zbekistonga yirik shoxli chorva sotishni taqiqlash rejasidan qisman voz kechdi.
Yanvar oyida go‘sht narxlarida keskin o‘sish kuzatilmadi. Ta’kidlanishicha, Qozog‘istondagi taqiq hech qanday taqchillikka olib kelmagan, ammo bir oy xulosa qilish uchun juda qisqa muddat hisoblanadi.
Izoh (0)